808 PureView 4,100萬像素影高一線

近年手機的拍攝能力愈來愈強，人人都揸住手機影Snapshot，玩得不亦樂乎！但對於追求質素的影友，始終覺得手機拍攝只屬「小學雞」玩意，寧願孭住大大部的單反出街也不願變心。

以上情況近日有機會逆轉，事關Nokia 808 PureView正式推出，搭載超誇張的4,100萬像素感光元件，配合Pixel Over-sampling技術，就算拉大張相都依然清晰銳利，龍友終於有部隨身「利」器了！

蔡司認證鏡頭

早排Nikon才推出3,630萬像素的單反機D800，勢估唔到咁快遇到對手，仲要係來自手機界嘅Nokia。808 PureView內置4,100萬像素感光元件，不但比巿面上的智能手機高3、4倍之多，連很多DSLR都唔夠佢巴閉！鏡頭更取得蔡司認證，支援F2.4大光圈及26mm廣角，配合ISO 1,600感光度，影夜景都冇問題。然而，基於感光元件增大至1/1.2吋，加上鏡片組較多，鏡頭難免凸出，最厚處達17.95mm，絕對稱唔上Slim！幸好它採用流線型設計，而且機背有磨沙質感，手感尚算不俗。

機頂設有HDMI、microUSB及3.5mm Audio等介面。

經Nokia銷售店或百老匯預訂的用家，可獲贈Joby腳架等配件。

超級Pixel更細緻

提升像素可能只是數字遊戲，唔擔保影得靚。為此，新機特別加入Pixel Over-sampling技術，在自動及場景模式下，會將相片內的5至9個Pixels合成1個超級Pixel，然後再壓縮成一張500萬像素相片；由於密度提高，成像自然更細緻，雜訊亦大幅減少。同一道理下，即使拍攝高像素相片，放大、裁剪後亦可保持超高質素。惟要留意此機只提供定時、微距、HDR等拍攝模式，連拍、全景、3D均不予支援，想玩多啲效果惟有另外裝Apps啦！

首載《Nokia Trailers》，提供荷里活最新電影預告片。

因比例問題，影16:9相片時只有3,400萬像素，用唔盡4,100萬像素畫質。

每張全像素相片的容量可達18MB，內置記憶體唔夠用時，可加裝microSD卡。

重用Symbian系統

系統方面，它並不如Lumia系列般選用Windows Phone平台，而是用回自家製的Symbian Belle，在1.3GHz單核心處理器推動下，雖然操作不及Android手機般爽快，但開Apps、轉頁及上網速度尚算合理。新機還可拍攝1,080p高清影片，並可透過HDMI輸出影像至大電視；最正是在Rich Recording技術輔助下，毋須外掛收音咪都能錄到如CD般質素的音色，回看自拍短片時自然冇「沙沙」聲啦！