潮玩Snapshot！IT o靚模愛攝戰

Jancy：自拍得意甫士

每次出席IT產品活動，都會謀殺不少記憶卡容量的Jancy，同姊妹逛街時例必玩自拍，所以揀相機的首要條件是自拍方便。「我自己好鍾意自拍，影得多便發覺相片嘅光暗和色彩好重要，如果影出嚟會皮膚暗啞的話，補幾多妝都冇用。最好可以配合埋得意甫士，例如單眼、嘟嘴、V字等，雙眼仲會有咁大撐咁大。」

自己執相擺微博

她間中會約埋姊妹出外拍攝風景，仲會自己整理相片。「赤柱係我覺得影相最舒服嘅地方，可以一邊影一邊Hea，影到攰又可以坐低抖抖，之後會返屋企用《美圖秀秀》軟件執相，佢可以話係內地免費版《Photoshop》，介面易用，功能又齊，仲有網頁版可以直接調校效果。」簡單執完相後，她便會將相片上傳至facebook和微博同粉絲分享，「上傳到微博是因為有好多內地人睇！」看來除了本地市場，Jancy還有意北望神州呢。

Pamela：至愛LOMO感覺

一臉天真無邪的Pamela，原來跟大部分女仔一樣，選擇相機的理由可以好簡單。「我覺得揀相機最緊要影到自己皮膚靚，如果嗰日狀態唔好的話，都有一個絕招，就係利用相機的LOMO效果，令到平平無奇的相片都可以好有Feel。」別以為個個o靚模都愛自拍，她便是例外的一位。「因為打開相簿便發覺影來影去都係自己個樣！但這不代表我不顧儀容，出席活動畀傳媒朋友影相時，我都會執靚個樣，最緊要係遮住黑眼圈同皮膚瑕疵。」

Lilam：Wi-Fi即影即傳

以甜美笑容見稱的Lilam平日玩開DC，美肌功能正是她那杯茶。為了能夠即時將靚相上載facebook，還準備了秘密武器。「近來好少開電腦，所以特登買張Wi-Fi記憶卡，影完相便可即刻過落手機，然後Upload到facebook和Instagram畀人睇。」Lilam覺得Instagram的正方形相很特別，啱晒新版面的facebook使用，「我自己facebook的Friend List大多是攝影師和模特兒朋友，擺相上網便可以分享最新工作近況。」

相機推介：旅遊之選

Canon IXUS 510 HS機身細細，卻內藏12倍光學變焦鏡頭，而且內置Wi-Fi傳送功能，帶去旅行最方便。

售價： $3,280（a）

自拍之選

Casio Exilim EX-TR150獨特的扭轉機框設計，令自拍更加輕而易舉，並支援美肌功能，難怪數度賣斷市。

售價： $3,680（b）

玩味之選

Olympus PEN Lite E-PL3外形時尚，相片質素佳，還備有不同機身顏色和多款藝術濾鏡，玩特效一流。

售價： $4,990（14~42mm鏡頭套裝）（c）

撰文：黎子豪

攝影：胡振文（部分相片由受訪者提供）

查詢電話：（a）3191 2333、（b）2926 2300、（c）2376 2150