Game廠要在PS Vita推出遊戲，難免會加入輕觸式玩法，但小記眼見唔少遊戲明明可以撳掣操控，卻夾硬變為篤芒，真係幾多餘，始終還是Mini Games最夾輕觸體感玩法！角色造型可愛嘅SEGA名作《Super Monkey Ball》，剛剛推出咗PS Vita版，可以傾斜機身控制「猴子球」邊食蕉邊碌到終點，仲加入供2至4人玩嘅體感迷你遊戲，大人細路都啱玩！
撰文：布偉倫
類型：解謎動作
開發：SEGA
平台：PS Vita
售價：$328
查詢電話：2359 7998
以往《Super Monkey Ball》都係用手掣玩，控制猴子球鬥快碌到終點，兼且搶食香蕉，玩法簡單易上手。今次PS Vita版本便用盡其觸控體感機能，在單人標準模式靠傾斜機身來左轉右轉、加速減速，而遊戲仍會提供傳統Analog控制玩法畀大家揀！新作仲唔會限制各位玩預設場景，可以用埋PS Vita機上的鏡頭拍低圖像，生成一個新場景，夠晒新鮮。
同家用版最唔同嘅係今集加入好多體感迷你遊戲，可以用盡遊戲機的前後置觸控板陀螺儀，仲支援到多人齊齊玩。譬如迷你遊戲「數字球」跟「撞球」需要將PS Vita直向把持，然後捽畫面將猴子球撞向預定目標。「數字球」玩法同美式桌球相似，需要鬥快擊中順序號碼波，嫌難度低的話，仲可揀「Random」玩法，數字會唔依次序亂出。至於「撞球」則容許4位玩家以回合形式進行，「碌」到地圖中間的旗仔有分外，仲可以諗計將對手撞落場景嘅隱蔽地洞得分。
點先用得着機背觸控板呢？有個名為「Monkey Rodeo」嘅迷你遊戲便玩得到，靠篤機背令猴子彈來彈去，在限時內蒐集香蕉，並支援4人連線比賽。至於另一個迷你遊戲「Pixie Collect」更可用埋後置鏡頭AR玩法，透過鏡頭捕捉虛擬場景的小精靈，將PS Vita的獨特操控玩法共冶一爐。而小記玩落覺得最有挑戰性反而係以左右Analog掣控制兩個猴子球行唔對稱賽道嘅「Love Maze」，左右腦唔協調的話，會好易跌落深坑Game Over。