汪圓圓返學look冇重複
做藝人最忌被人發現同一件衫着兩次，模特兒汪圓圓早在中學時已經嚴格遵守這個禁忌，愛好打扮的她每日都以不同造型返學，並以此為樂，果然注定她食模特兒這行飯。
模特兒汪圓圓有位摩登媽咪及靚家姐汪詩詩，受到她們的耳濡目染，圓圓自小已極愛時裝及扮靚，只要舉一個簡單例子就會明白她有幾愛——在加拿大讀書時，中學不用穿校服上課，當時圓圓就要求自己每天也要以不同服裝返學，不可重複，幾乎整個中學階段也嚴格執行，認真誇張。她解釋：「總之完全一樣嘅裝扮唔可以着兩次，同一件衫可以配唔同嘅下身，或者加襯唔同嘅飾物。呢個唔算係一個硬性規定，係出於自發性，如果着同一套衫，我會覺得唔自在。不過，依家已經無咁嚴重，當然做咗模特兒之後，工作需要都會盡量唔想重複着同一件衫。」
圓圓直認家中衣物已經多到逼爆房，房間已無多餘空間加放衣櫃，她無奈說：「因為我係一個唔捨得丟衫嘅人，有唔少衫一次都無着過，有啲係因為尺碼唔啱，我就會諗自己可能將來會肥咗或者瘦咗，咁到時就啱着啦！」
唔係只捧大牌子
雖然圓圓出身自小康之家，又是從事模特兒工作，經常接觸大牌子，不過，她不是那種非買大品牌不可之人，她喜歡Dolce & Gabbana，但價錢親民如Zara、bread n butter也都被她歸類為喜愛之列。圓圓自認慳妹，捨不得花太多錢置裝，最豪一次買給自己的衣飾，也只是萬多元的手袋，但她已大感肉痛，又謂：「其實買得最貴係屋企部電腦，哈哈！」
承認有少許購物狂的圓圓自問對鞋子最無抵抗力，家中擁有近百對鞋子，提到最愛的一對鞋，原來並非出自某某鞋王之手，而是一對特價時購買、價值500元的涼鞋，她重複了N次說：「嗰對鞋真係好靚好靚！」繼而大讚：「成對鞋係透明，睇落好似無着鞋咁，可能喺其他人眼中唔覺得好靚，但我真係好鍾意，我去印度旅行都係着住佢。」之後表情轉為悲傷說：「不過對鞋唔見咗，有一次我同Karson（男友蔡加讚）出海，佢駕駛水上電單車，我坐喺佢後面，後來對鞋嘅鞋帶斷咗，就係咁跌咗喺海中心，我去番同一間舖想買番呢對鞋，但已經買唔到，真係一個遺憾！」
心有靈犀情侶裝
提到男友Karson，圓圓認為以男孩子來說，他屬於貪靚類型，注重儀表，又有衣着品味，不過，最有趣是二人經常撞衫，無意間變成情侶裝示人，圓圓大叫：「真係覺得驚o架！我哋從來都唔會夾定着咩衫，但就經常會撞色撞Pattern，例如佢着黑色橫間衫，我就着咗黑色橫間裙，類似情況已經試過好多次，後來已經撞到無感覺。」圓圓口中話撞到無晒感覺，但換個角度係心有靈犀就真！
文﹕陳嘉敏
攝﹕吳文聰
場地﹕Indochine（蘭桂坊）