D20四防收身船P拍住上

每逢夏天，沙灘暢泳和船P等活動頻繁，女士們毫不吝嗇大晒比堅尼，何解男士們要着得密密實實呢？原來係肚腩壞事！近年四防DC的處境一樣，就算能夠上天下海，但圓碌碌外形甚無賣相，為此Canon於第二代四防相機PowerShot D20將外形大改，明顯收身之餘，更可另購專用配件，以後去船P影人影景都唔怕整濕或撞親部相機啦！

色彩襯到絕

很多DC每年都會升級換款，但Canon自09年發布「肥嘟嘟」的D10後，事隔3年才推出後繼機。今次D20外形明顯纖瘦得多，厚度由上代49mm大減至28mm，配合流線型設計，握機感覺更舒服自然。而黑色機身可選擇配搭藍、銀和黃3種鋼片作裝飾，連機背按鈕都用埋同一色調，襯到絕之餘，實際備有10米防水、1.5米防撞、-10度抗寒和防塵功能。加上，新機採用特製的3吋PureColor II G屏幕，比一般屏幕可抵受高2倍壓力，咁就唔驚水壓或跌撞引致爆芒啦！

配件強化功能

怕游水時大意將相機掉進大海？其實新機備有另購的AKT-DC2配件套裝，內裏有齊鐵扣帶、相機肩帶、矽機套和浮水配件等，保證相機能緊貼大家身邊，而且可避免刮花機身，一舉兩得！想貪心一點玩埋潛水攝影？廠方為大家準備了40米專用防水殼WP-DC 45，配合相機的1cm微距功能，在海底影珊瑚、拍海星肯定冇甩拖！此外，新機內置GPS全球定位功能，啟動後能自動記錄相片及短片的拍攝時間和地點，只需透過附送的《Map Utility》軟件，便能於Google Maps上顯示拍攝位置，重溫時更能勾起歡樂回憶。

機面有塊彩色鋼片，感覺時尚之餘，更顯堅固。
售價：$3,280

機側插位備有防水膠邊保護蓋。

玩味模式齊全

拍攝靜態物件可以用微距，但面對水中游來游去的小魚又點算好？為求讓大家使用更方便，新機除了將水底Mode獨立置於模式介面上，另備有Quick快速對焦模式，配合Canon自家HS System技術和ISO 3,200感光度，加上雙重穩定系統，拍攝身邊游過的小丑魚，隨手一㩒已能攝於鏡內，唔怕出現鬆郁朦！此外，新機內置Scene Detection自動場景偵測技術，以及多種創意濾鏡，可拍攝出魚眼、模型和針孔等趣味效果；另支援1,080p全高清拍片，讓大家捕捉精彩水底畫面！