到時到候，就有國際巨星跑來大中華地區打個白鴿轉，近日粉墨登場的是姬蒂賀姆絲（Katie Holmes）。朋友說：「唔好意思─我想問問佢係邊位？」我笑答：「佢咪係一位『國際巨星』囉。」
姬蒂賀姆絲最膾炙人口的角色，是「湯嫂」，湯告魯斯的太太。兩人生了一個趣致可人的囡囡，立即妻憑夫貴兼母憑女貴，不斷成為雜誌封面和娛樂版焦點……所以呢，當姬蒂賀姆絲隆重登陸北京，召開龐大記者招待會，卻絕口不提老公女兒，在場記者都O嘴，低聲嘆氣：「咁真係冇咩好講喎。」
她也不是全無新聞瞄頭，根據台灣的報道，超瘦的姬蒂賀姆絲會見記者時不慎走光，白色底褲邊還跑出小草叢，而贏得「阿湯嫂北京秀排骨線，露底放送黑森林」大標題，總算讓傳媒有功課交，辛苦晒。
姬蒂賀姆絲的演藝成績，是有目共睹，最新力作是在年度爛片《龍鳳黐孖J》擔任配角，叫記者怎開口？英國《每日郵報》指她愈見不濟，並非空話。
姬蒂賀姆絲也被某些美國傳媒塑造為Fashion Icon，可見湯佬影響力強大，可惜姬蒂賀姆絲一擔沙糖一擔屎，這邊廂穿得靚靚出席活動，那邊廂甩頭甩髻行街買餸，頻密地淪為狗仔隊、八卦網頁和「時裝警察」的笑柄。
中國人懼洋又崇洋，是千古不變的事實，西方演藝界很理解，所以間中來華搶光。對於水準不夠者，我們不必吹捧，笑吓就算喇。
網址：hk.myblog.yahoo.com/ccc3www3