Robot魂龍王丸魔神變招
「飛雲！機會嚟啦！」呢句久違了的對白，最近於各大討論區再次出現，事關90年代紅極一時的卡通《魔神英雄傳》，主角機龍王丸經由Robot魂玩具系列重生，難怪唔少大朋友都想買番盒尋回兒時回憶。新作的質素較上代龍神丸大大提升，連附送的飛雲人仔都像真度十足，更備有變形「鳳王」的噱頭，配合特效配件，使出絕招「鳳龍劍」更繪影繪聲！
簡單變「鳳王」
龍王丸比上代貴咗近1倍，全因新作多了變形機關。玩家只要將盾牌安裝在機背，再拉出鳳凰頭，雙腳外翻90度變成羽翼，然後拆掉拳頭，並將前腕的爪拉出，龍王丸便可變成「鳳王」形態，過程都算簡單！針對玩具的可動性，新作還加入多項改善，如腰位多出一截延伸關節，讓機體能前後俯仰；肩膀連接位亦加入獨立關節，增加膊頭的移動幅度，大大提高擺甫士的靈活性。
飛雲表情夠Chok
配件方面，新作除咗附送套於鳳龍劍上的火燄特效、龍雷拳出招時的火拳配件外，連主武器鳳龍劍都買一送一，可使出「雙劍流」。可惜劍風套件特效有穿崩位，而且龍雷拳特效純粹得火團，內裏並無拳頭，造工有點兒戲。幸好玩具整體塗裝出色，如主體珍珠白的質感、膊頭精細的龍形浮雕、頭冠透明金屬的上色效果等，均令玩具加分。但要講最精彩之處，莫過於飛雲Figure，盔甲線位細緻，更表現出飛雲水汪汪的眼睛，加上微微上翹的幼眉，造得恰到好處，實在是一大驚喜！
撰文：廖俊斌
攝影：胡振文
查詢電話：2433 1828