盧均宜教路歐國盃睇波大作戰

新鮮出爐的香港足球先生盧均宜急不及待換上新波衫，等睇波之餘亦為今屆賽事提供必睇心得，等大家咪錯過精彩賽事。

商場睇波夠人多

去商場睇波逐漸成了港人睇國際大賽的普遍模式，最大誘因莫過於能夠湊合大量球迷一齊睇波，氣氛一流。計熱鬧，今年的主場則是觀塘的apm商場，事關獲得歐國盃播放權的now TV，將會在商場的大堂播放6場包括揭幕戰及決賽的賽事，並會於首場前夕舉行直播派對，而於6月7日至10日，商場的大堂層亦會展示應屆歐國盃球隊官方戰衣，並請來Michael Lau設計了一個名為Baller的角色擺設，令場區更有睇波氣氛；另外，奧海城商場會於6月22日的8強賽事至7月2日的決賽期間，於其2期地下主題中庭播放賽事，顧客需作$200或以上的消費便可換領直播區入場證1張；想足本睇晒31場賽事，則可以到屯門市廣場，這裏的1樓中央廣場及3樓位置會由揭幕戰播到決賽，而且沒有消費規定，大家可免費足本睇個夠。

酒吧觀戰至夠High

酒吧似乎注定跟睇波連在一起的，在酒精及小食的推波助瀾下，大家似乎更能投入球賽之中。港島最熱蒲點蘭桂坊內的The Whiskey Priest，是不少球迷的聚腳地，充滿愛爾蘭傳統風味的裝潢，更設有100吋投射大屏幕，讓球迷看清場上的所有動靜，而且這裏有不少小食的選擇，例如混入了威士忌的德國昆布倫腸及愛爾蘭炸魚，絕對是睇波的恩物；至於九龍方面，西九某商場的Grand Central Bar & Grill，樓高兩層的美式餐廳流露着截然不同的時尚氣息，以齒輪為裝飾、及以紐約市的大廈線條布置牆身等念頭，都叫人眼前一亮，餐廳本身設有多部電視及投射幕，加上食物選擇夠多，小食甜品外更有牛扒及生蠔等選擇，成了不少波友的睇波基地。而且兩間酒吧都會過凌晨兩點收工，要安坐於此舒舒服服地欣賞首場賽事絕無問題。

意大利有力爆冷

今年歐國盃有16支球隊參與、共31場賽事，全部安排於香港時間12:00mn或2:45am開波，夠精力全部睇晒當然最好不過，但大半個月不停開夜車始終唔係辦法，均宜就推介了必睇之選：「分組賽要留意被形容為死亡之組的B組，荷蘭、德國都係勁旅，而葡萄牙則屬黑馬，三隊中只得兩隊出線應該爭崩頭。」至於心水球隊方面，均宜就認為決賽離不開西班牙、德國及意大利3隊，均宜卻有自家睇法：「意大利被睇淡時反而會打得好，2006年世盃就係以爆冷姿態捧盃，呢期意隊被打假波醜聞困擾，球員們更加要努力去還自己清白。加上在曼城有尚佳表現的巴洛迪利備受國家隊重用，亦係一個利好因素。」至於香港甚多粉絲的英格蘭，均宜就唔太睇好：「近年沒有很大的進步，而且隊形唔完整，應該8強止步。」

睇波新體驗

2012年睇歐國盃，當然要有新的諗頭，而關鍵落在呢期勁Hit的平板電腦及智能手機身上：有關方面推出了睇波App，令今年歐國盃唔需要局限於固定地點。而是次的睇波App分為兩款：本身係收費電視用戶，就可用「now隨身睇」App收看所有2012歐洲國家盃的直播賽事；另外亦設有「now TV歐洲國家盃」官方應用App，齊備了場地介紹、比賽日程等球場資料外，更有好多如開波前情況、球員步入球場及更衣室等花絮，而隨着賽事進行，關鍵片段如入球、犯規等會不斷更新，用家更可從不同角度翻看，令睇波多添一分趣味。另外，上年大行其道的3D睇波，今年依然有得睇，假如本身屋企電視有3D功能的話，用now TV睇歐國盃決賽便可以感受3D睇波效果，唔使入戲院都感受個波射埋嚟的立體效果。

2012歐洲國家盃小檔案

主辦國家：波蘭、烏克蘭

日 期：6月8日~7月1日

參賽球隊：16隊

比賽場地：8個

比賽場數：31場

The Whiskey Priest

查詢：2869 0099

Grand Central Bar & Grill

查詢：2736 4888

撰文：張超駿

攝影：盧展程（部分攝影）

鳴謝：adidas