索女Cult喪屍Jessica C.起勢鋸

Cult Game製作人主理

唔止揸鋸擺甫士，Jessica C.試玩過呢隻遊戲後都讚Cool！雖然《Lollipop Chainsaw》嘅畫面同動作流暢度未算好高質素，但勝在橋段夠爆，由專出Cult Game嘅製作人須田剛一主理，結合美式風格及萌系元素，怪雞得嚟又幾討好。故事講美國高中啦啦隊隊長Juliet同男友Nick喺學校調情時，成間學校的同學都變晒做喪屍襲擊佢哋，男友被咬就快變喪屍嗰陣，Juliet就用粉紅色電鋸，鋸咗男友個頭落嚟，掛喺腰間周圍走，口味極重！

粉紅電鋸招式極萌

掛住男友個頭有乜用？除咗得閒可以傾吓偈外，當見到遊戲入面出現藍色無頭喪屍時，只要將男友個頭安上去，便可控制佢去做粗重嘢，例如清除路障等。Juliet主要用嘅武器係一把粉紅色電鋸，玩法同其他動作遊戲差唔多，分普通攻擊同Charge攻擊，就啱角度同時間，一下Charge攻擊便可鋸甩喪屍個頭，好過普通攻擊鋸極都唔死；而且埋身角力時，鬥㩒掣贏出的話，可以由上至下將喪屍鋸開兩半。招式方面亦好萌，又踢腿又倒立，仲會拎住啦啦球，出招時滿布粉紅心心，唔係個個玩家頂得順！

精彩場景加靚衫

新作的取向唔算太血腥，至少血花唔多，而且出場嘅喪屍都唔算惡形惡相，每關大佬都係同音樂有關，有玩Punk、Funk、Viking Metal同Rock'n'Roll等，鋸起嚟都幾過癮。除咗主線於課室、棒球場、垃圾場等戰場打喪屍外，新作仲向懷舊遊戲致敬，在Mini Games入面可去到仿《Pac-Man》同《Lode Runner》等場景玩！遊戲衰在冇得連線同人打喪屍，不過可以玩吓計分賽、金幣賽同競時賽，上傳分數至排行榜，另外仲有得儲金幣買靚衫畀Juliet換添！小道消息話，香港行版等同日本Premium版，有齊特典內容，即係話可Unlock埋主角嘅女傭服同三點式！

類型：動作　

開發：Grasshopper Manufacture　

平台：PS3　

推出日期：6月14日　

售價：$388　

查詢電話：2341 2356

撰文：布偉倫 部分攝影：張群生