1:6 Loki復仇妖模

事先張揚會出齊整隊復仇者聯盟1:6 Figures的Hot Toys，當然唔會放過這班女粉絲，日前便發布Loki試辦，不但服裝和武器跟足電影，最重要係頭雕堪稱同系列中最神似的一個，以後見到有女仔排隊落訂就唔好驚訝啦！

頭雕極像真

Loki於《Thor》電影中只係二打六角色，但來到《The Avengers》卻妖氣大增，戲份由頭帶到尾之餘，其小器又自大的性格，更令不少女觀眾由憐生愛，這吸引到絕少打造奸角的Hot Toys注意，特別為他製作1:6 Figure。試辦所見，新頭雕師Lee So Young充分拿捏到Loki的五官特徵，例如額高且窄、顴骨凸出、嘴巴凹陷及略帶妖味的眼神，也能忠實表現出來；加上塗裝由大師JC. Hong負責，難怪連蒼白膚色上的淡淡雀斑都睇得到！

長袍上有多層金色甲片，膊位也加裝了肩甲。

廠方表示，衫褲的褶縫位試製過多次才能如此立體。

重裝舊化盔甲

新作的服裝由多層物料混合而成，長袍正面和背面，均跟足電影採用不同顏色布料，膊頭位則加裝多層甲片，有層次感得來亦唔覺臃腫。而整件盔甲採用啞金色塗裝，配合少許舊化效果，擺戰鬥甫士時更加「入戲」！配件方面，隨盒會多送一個羊角形頭盔，等大家一個頭雕能變到兩個造型出來。惟留意頭盔要分件戴上，而且戴前要先拆下後頸位置的頭髮，更換時略嫌麻煩咗啲。而武器則備有長、短權杖，以及2柄匕首和9隻可換手掌。廠方表示，日後還會補上片中出現過的口罩及手銬，等大家將佢逮捕返屋企。

皮Boot上半部用仿皮，鞋身則是軟膠，柔軟度及紋理兼備。	長袍的正、背面跟足電影設定，以不同顏色的物料縫合。	參照電影設定，將1:6 Loki的高度定於32cm左右。

撰文︰陳志滔

攝影︰謝孝祥

查詢電話︰2388 4677