NBA決賽打到嚟！ 剖識波鞋球衣
NBA西岸決賽今日正式開打，由經驗老到的馬刺對活力十足的雷霆，東岸決賽有三劍俠坐鎮的熱火，至於第四隊亦於昨天塵埃落定，卡士十足。但睇NBA季後賽和東西岸決賽，除咗睇球員爆籃入樽、教練調配同戰術運用之外，其實球星所着的波鞋顏色、款式，以及各隊的球衣印章都大有學問，以後朝朝追NBA決賽之餘，仲可以學好多冷知識！
謎團1
今年Nike出咗對Elite季後賽版波鞋，明明巿面賣緊「金剔」版，點解球星着嘅同款鞋會唔同色呢？係唔係總決賽先着得金色？
解密
網上波鞋專門店SuperKicks老闆Jacky表示，很多球星落場比賽時，都會穿着新款波鞋，近期打緊的NBA季後賽，勒邦占士便穿着落場版LeBron 9 Elite，只係嗰「一剔」改咗用自己球隊的Miami Red紅色。其他球星如高比拜仁所着的落場版Kobe 7 Elite，嗰「一剔」亦用番Lakers Purple紫色，街外買唔到，當然比金色原版矜貴啲。因此很多人誤會金色喺決賽先着得，但坊間好多人會自己整番對iD鞋襯不同顏色。
今年3款Elite版Hyperdunk Elite、LeBron 9同Kobe 7，都係玩「黑金」同「白金」撞色，香港都未有得賣。「不過季後賽期間，高比唔止着咗對Elite版，仲着埋Kobe 7聖誕版同毒蛙版等新鞋添。其實除了呢3對季後賽波鞋之外，最多人等緊嘅係雷霆新星杜蘭特KD 4季後賽版，如果到貨肯定大把人買！」
謎團2
既然有季後賽版波鞋，有沒有總決賽版波鞋？
解密
Jacky話過往會有總決賽版波鞋，但唔係每年都推出，要睇吓邊個球星打入總決賽，同埋有冇號召力先得。早兩年推出過的總決賽版波鞋，好似Peak匹克特別為小牛控衞傑特，推出Peak Kidd「2011 NBA Finals」PE白底金色波鞋。Nike亦為2010年總冠軍高比拜仁推出金版Kobe 5，用上尊貴的白金色設計。至於今年有冇總決賽版波鞋，好睇近日開戰的東西岸決賽之勝出隊伍。
謎團3
足球比賽經常有決賽波衫，燙上不同印章和字體，NBA總決賽又有冇決賽版波衫？
解密
NBA物品收藏家兼TMC老闆Thomas表示，NBA總決賽隊伍所穿着的波衫，同打常規賽或季後賽冇乜大分別，唯一唔同係右胸前繡上The Finals金章。而呢個The Finals金章亦唔會年年一樣，至於左胸前的NBA章，亦試過轉款，好似為慶祝NBA成立50周年時，就試過改成金章。至於總決賽上，間唔中見到NBA球衣繡上特別意思的印章，在NBA官方商店未必有得賣，反而球會網站可搵得到。
謎團4
NBA總決賽場地和籃球，會否與平時不同？
解密
Thomas指出，總決賽所打的籃球跟平時一樣，最大唔同係球場上的裝飾，如球場地面印上NBA Finals字樣，進場儀式亦隆重好多。反而打完總決賽之後，會出紀念版金波，Thomas便擁有限量推出的2008年NBA總冠\軍金波，以及1998年公牛贏取總冠軍後，限量推出1,998個的紀念籃球。
NBA冷知識：Logo設計由來
其實NBA Logo是參照前湖人球星謝利韋斯（Jerry West）的運球姿態去設計。他於球員時期曾14次入選明星賽，1983年入選NBA名人堂，而湖人亦高掛了他所穿的44號球衣。
Hall of Fame名人堂
登上NBA Hall of Fame名人堂，需要經過多個小組提名、遴選、投票及確認程序，而且球員退休5年後方可獲得提名資格，所以名人堂內找不到現役球員。近年入選的退役NBA球星包括米高佐敦（2009年）、卡爾馬龍（2010年）及柏賓（2011年）。
撰文、部分攝影：布偉倫