《Max Payne》可說是經典遊戲，除咗吓吓都似足Mark哥咁飛身雙槍射擊外，佢仲首創Bullet Time子彈時間，可以慢鏡避子彈兼射敵人，對之後嘅動作遊戲影響深遠。但早期推出嗰兩集，都只係單打獨鬥，未必啱時下玩家嘅胃口，所以《Max Payne 3》將慢鏡引入多人模式，只要一經發動，視線內所有玩家都會陷入慢動作狀態等你射，勁過癮！
頭兩集《Max Payne》係01年同03年嘅作品，今集由開發小組到故事背景都改晒，講述主角Max Payne唔再喺紐約當差，嚟到巴西聖保羅做私人保鏢，保護有錢佬Branco同佢屋企人。想當然，主角再度捲入黑幫仇殺之中，為了凸顯新環境新作風，主角更剃光了頭、換上背心變成大叔，但係拎起雙槍飛身掃射等絕技仍然冇生疏！
慢動作鏡頭係《Max Payne》系列一大特色，除咗可以喺單打模式用到之外，今集更將慢鏡引進連線模式內，只係發動Bullet Time嘅玩家，同佢視線內所見嘅人先會落入慢鏡，讓玩家可以睇定慢慢射，而被射嘅其他玩家惟有硬食。同時Bullet Time模式亦有所進化，只要擊殺特定區域內最後一個敵人，便會進入Final-Kill Cam狀態，會慢動作播放特寫鏡頭，好鬼有型。而在中槍後嘅瀕死狀態，玩家如果擊殺射你嘅人，電腦便會餵你食止痛藥補血。
單人模式可慢慢嗒真故事，睇吓主角點樣做低成千上萬嘅黑幫；但多人戰先係重點，在Payne Killer模式，玩家只要殺死扮成Max Payne同佢助手嘅玩家，就會變成佢哋，成為其他玩家目標，刺激有趣；在Gang Wars模式，玩家會分成兩大勢力廝殺，每次任務係根據各隊表現而定目標，好似上一波殺人最多嘅玩家，隨時變成新一波嘅獵殺對象；搶得多地盤嘅一方又可能要拆除自己地頭上嘅炸彈。另新增Crew幫眾系統，會幫玩家記錄互相嘅過節，如果做低同你有過節嘅玩家，便會獲額外獎賞，仲可帶落年底《GTA V》度玩添！
類 型：動作
開 發：Rockstar Vancouver
平 台：PS3、Xbox 360
推出日期：5月18日
售 價：$469（PS3）、$429（Xbox 360）
查詢電話：2359 7998
撰文：布偉倫