MEDIAS TAB N-06D平板玩水

過去一星期時而天晴時而驟雨，變成落湯雞事小，心愛平板淋濕事大。一向設計貼心的日系廠商，踏入夏天旋即推出防水Gadgets，好似新鮮由水路到港的7吋平板MEDIAS TAB N-06D，9.9mm纖薄外形便攜之餘，仲支援IPX5/7防水標準，跌落1米水深仍能操作自如，行街時傾盆大雨都冇有怕！

MEDIAS TAB N-06D 售價：＄5,280

9.9mm纖薄機身

近年市面上有唔少防水Gadgets，較常見有相機、手機等，而N-06D屬少見的防水平板。有別於一般大大件、設計老套的防水產品，廠商刻意將新機屏幕凸高，配合銀撞黑色圓邊設計，側面睇勁有流線感；而銀色機背更加入磨沙處理，拎出街使用時唔怕跣手。最抵讚是新機雖然支援IPX5/7防水標準，但機身只重349g及厚9.9mm，Size與一般平板機款接近；加上7吋修長設計，適合大家單手篤芒睇片。

高清屏幕靚聲睇片

新機於日本以DoCoMo的《NOTTV》多媒體廣播服務作為主打，方便用家行街睇電視，可惜香港地區用唔到相關服務。但大家唔使失望，因為新機嘅睇片功能都唔失禮，好似7吋屏幕的解像度達1,280×800，色彩自然又細緻，仲用上Corning Gorilla強化玻璃，冇咁易刮花；另內置Audyssey及SRS音效技術，不但扭到大大聲都唔拆，低音效果仲好紮實，睇片、聽歌皆宜。值得一提是，跟機附送充電底座，可以將機身橫向斜斜擺放，攤喺梳化睇片一流！

記憶卡等插槽加入防水膠邊，於1米水深可玩足30分鐘。

支援香港3G網絡，惟採用microSIM卡。

9.9mm相當纖薄，而且銀撞黑色頗為討好。

雙核規格化身手機

要睇片出色，單靠靚芒和音效都未夠，新機特別採用1.2GHz雙核心處理器及1GB記憶體的強勁規格，保證可以流暢播放高清片。系統方面，新機只預載較舊的Android 2.3，幸好原廠介面經過優化，如加入快捷鍵的狀態欄、長按Home鍵Kill Task等，用落幾方便！而新機雖然支援LTE制式，但屬日本DoCoMo Xi網絡，與香港現有的4G制式不同，不過一般香港3G網絡都仍然用到；另備有撥號通話、SMS短訊功能，機身更內置聽筒和咪，收音能力不俗，可以擺埋耳邊當電話煲粥。