5月對一眾打工「仔」來說是一個頗為艱難的月份，事關勁多球類盛事在這個月份發生；而當中最矚目的，當然是香港時間5月20日這個足球界的大日子，事關凌晨2:45正是歐聯決賽上演時間！今屆歐聯決賽由德國的拜仁慕尼黑迎戰英超的車路士，當然門票依家就冇可能買到，不過決賽前後的瘋狂氣氛，也許是你飛一趟慕尼黑的理由！
可能大家會奇怪，為何來到歐聯決賽都仍然有主客場之分？其實事有湊巧，今屆歐聯一早就已經決定咗決賽將在拜仁慕尼黑的主場安聯競技場舉行，而主隊有幸在這裏爭標都只係有咁啱得咁蹺！講到安聯競技場，球場於2005年4月正式啟用，為拜仁慕尼黑及德乙聯賽隊伍慕尼黑1860共用的主場，花費3.4億歐元打造，可容納66,000人，實在非常宏偉！而其外形如一個大車胎，玻璃幕牆更可因應不同賽事上演而換上不同顏色，於夜間球場的外觀可謂變化萬千。此球場上演的盛事已經不是第一次，2006年世界盃的揭幕戰同樣在這裏上演，而今次歐聯決賽的戲碼，將為球場的歷史寫下光輝的新一頁。
主隊有機會在自己的球場上捧走歐洲聯賽最高榮譽，慕尼黑市內當然是興奮到頂點！由5月16日開始，當地政府將在慕尼黑奧林匹克公園請來一班歌星及樂隊如Aloe Blacc、Sunrise Avenue及Moop Mama表演，為大戰氣氛來個全面Warm Up。而屆時於球場的外圍一定有大量化好妝兼打鑼打鼓的忠實球迷聚集吶喊，此等熱鬧場面香港一定搵唔到。所以話，雖然歐聯決賽門票就冇可能買到，但親身飛去慕尼黑，一邊飲住德國靚啤，一邊同當地球迷狂歡，一定好過在家中梳化捱眼瞓！
網址：www.allianz-arena.de
撰文：梁爾桓