RAZR MAXX電量打孖上傾足17.6小時

你同我都唔鍾意人囉嗦，但原來「長氣」唔一定惹人討厭，講足17.6小時一樣得人歡心，說的是Motorola新機RAZR MAXX。單睇外形雖然似足上代RAZR設計，但新機大幅提升電量至3,300mAh，比一般智能手機的電量多近一倍，而且厚度仍只得8.99mm，並繼承KEVLAR纖維背殼，裏裏外外都有型有款！

售價：$4,498

3,300mAh鋰電池

Smartphone功能愈來愈多，但電量就愈來愈唔襟使，平時搭車上網、聽吓歌，唔夠半日已經冇電，冇帶隨身充電器都幾麻煩。RAZR MAXX就幫你解決這個問題，內置3,300mAh鋰電池，一般智能手機如iPhone 4S的電池都只得1,432mAh，數字上已經多咗超過一倍。據廠方表示，新機的通話時間長達17.6小時，出街傾電話幾長氣都唔怕！而美國摩記仲為新機拍咗條YouTube短片，片中以RAZR MAXX同iPhone 4S等手機喪玩串流音樂，5小時之後，iPhone已經冇晒電，但新機仲剩低60%電量；雖然外國版手機的規格稍有不同，但絕對值得參考！

平滑機背手感佳

驟眼睇新機，外形同上代RAZR差唔多，繼續用上鑽石切割鋁製外殼，配以防彈衣物料的KEVLAR纖維和納米防水濺鍍膜。難得新機換上大電池後，機身仲Keep到8.99mm厚度同145g重量，抵讚！值得一提是，由於新機要放入大電池，上代機背兩端的凸出位置被「填平」，手感反而變得更加好。屏幕方面，沿用4.3吋Super AMOLED Advanced靚芒，色彩鮮艷、可視角高，而且qHD解像度加上16:9比例，用來睇片、睇網頁都好Fit，觀感唔錯。

機背用上防彈衣物料KEVLAR纖維，手感幾好。

Smart Actions功能可以因應不同環境，加入自動連鎖反應。

預載Widgets都幾實用，好似社交網絡便整合twitter、facebook等。

預載Widgets都幾實用，好似社交網絡便整合twitter、facebook等。

Android 4.0升級有望

規格方面，新機與上代亦大同小異，選用1.2GHz雙核心處理器、1GB RAM，整體操作流暢，可惜只預載Android 2.3系統；而廠方表示稍後會一併為兩代RAZR升級至Android 4.0，據講電量控制會做得更好，到時新機肯定更「長氣」！不過舊系統亦唔係冇優點，因為RAZR備有不少獨家功能，好似智能模式下，用家可設定手機在不同環境，自動作出連鎖反應，例如夜晚轉為靜音模式、電量跌至10%自動關閉Wi-Fi等，過癮得來都幾實用。

內置「資料節省程式」，啱晒唔係無限數據Plan的用家。	備有智能撥號功能，輸入相關英文的數字鍵，便可搵到聯絡人。	舊版RAZR（左）明顯較薄，不過RAZR MAXX（右）的機背更為平滑。
機頂備有micro HDMI輸出插口，方便接駁大電視。	採用microSIM卡，用傳統SIM卡嘅人士要留意。	Corning Gorilla防刮玻璃配合4.3吋靚芒，用來睇相色彩細膩。