4.7mm幼邊框 LM9600玩Dual Play

懸浮底座設計

今年多款LG Cinema 3D Smart TV都用上幼邊框設計，當中最出位是旗艦級LM9600，55吋畫面只設有4.7mm邊框，在正常距離下睇電視，只會發現屏幕旁邊多了一條線，觀感自然更靚！為配合幼框畫面，新機亦用上懸浮式底座，感覺高貴之餘，驟眼睇好像整個畫面浮於半空一樣；而且底座更能左右旋轉，要調校觀賞角度毋須將整部電視移動，是近期少見的設計。

戴3D眼鏡玩雙打

LG Cinema 3D Smart TV去年已開始用FPR制式顯示3D畫面，即是只需佩戴戲院的偏光式3D眼鏡，便可睇到立體影像。用家可能擔心，睇3D時立體感太強，容易令雙眼疲勞，好在LM9600貼心地提供20級深度作調校，可調整到最啱Feel的立體深度睇片。

可透過Magic Remote遙控器，Pointer式體感操作Smart TV介面。

除內置3D Sound Zooming技術外，亦支援Clear Voice II提升人聲音質。

早前有廠商出過一款專為3D遊戲而設的屏幕，兩位用家同時戴上3D眼鏡可睇到不同影像，一個顯示屏便可讓兩人Full Screen玩雙打。今次新機都引進名為Dual Play的顯示技術，只要配上左眼偏光鏡片或右眼偏光鏡片的專用3D眼鏡，便可做到上述效果。小記即場以Xbox 360《Gears of War 3》遊戲試玩，一副3D眼鏡見到城鎮畫面，另一副3D眼鏡的場景卻是身處敵陣；當然，冇戴3D眼鏡的話，只會睇見兩層花綠綠的畫面。

今年LG Apps數量再加碼，能下載K-Pop App追韓風。	提供2組USB 3.0及4組HDMI端子，連接介面充足。	高貴底座設計，中間還設轉盤可左右調校角度。

顯示效果出色

新機另一特異功能是支援WiDi無線技術，只要手提電腦同樣對應WiDi的話，便可以無線連接，用55吋大電視顯示電腦畫面；充當主畫面又得，或者以延伸方式顯示亦得。稱得上新旗艦電視，畫質亦屬超班之作，配備480Hz TruMotion動態影像流暢技術，顯示高速移動畫面及3D場景時更順滑。電視同時轉用Nano Full LED背光面板，能獨立調控LED光暗，提升顯示層次感。

新款3D眼鏡的鏡片面積較大，可減少漏光問題。

旁人睇到眼花花，其實佩戴專用3D眼鏡後，兩位模特兒正觀看不同對戰畫面。

此外，3D眼鏡今年亦轉了款，眼鏡重量仍然維持在14g，但鏡片面積較舊型號多15%，有效防止眼鏡上方漏光問題。音效方面，在內置3D Sound Zooming技術下，電視會根據動態影像的景深進行分析，從而模擬出不同音場，令音色表現同樣3D！不過率先推出的55吋LM9600定價要$43,980，比同廠同尺寸的旗艦級電視貴$7,000，似乎售價未夠進取。

同場加映：LG Cinema 3D Smart TV新系列

LM8600另一高階選擇

LM8600的機身設計跟LM9600接近，只是邊框纖幼程度不及後者；另只配備LED Plus背光系統。但其餘3D Sound Zooming、WiDi技術全部有齊。

LM6690潮白3D TV

LM6690定位為入門3D電視，白色機身屬少見的設計，底座亦跟其他機款不同；具備47吋及32吋選擇，亦能支援WiDi技術及Dual Play功能。

規格表

解像度：1,920×1,080

顯示技術：480Hz動態影像流暢技術

背光系統：Nano Full LED

連接端子：HDMI×4、USB 3.0×2

撰文：布偉倫

攝影：方偉堅

查詢電話：3543 7777