可愛三防S30 雨中抓拍

春夏之間，天氣總是陰晴不定，出去戶外拍攝，最怕是相機給雨水或霉氣入侵。Nikon最近推出的COOLPIX S30便可為大家解困，皆因它定位為入門三防相機，$1,180的售價，已備有3米防水、0.8米防撞和防污功能。最吸引是有埋可愛的粉藍、粉紅、黑、白4色機身，睇Slide Show時仲有動畫穿插，最啱小朋友或女生使用。

圓潤粉色機身

S30圓潤的外形加上粉色設計，賣相予人可愛觀感，連按鍵都以又大又圓的按鈕作主導，當中機頂的攝錄鍵和快門鍵差不多成個一毫子硬幣咁大，易按之餘，夠晒Kawaii。機背設計方面，新機以特大十字按鍵代替變焦桿，按上按下即可Zoom近Zoom遠；不過廠方卻取消了Menu鍵，改於左邊加入4個選項掣，一按即會出現相關介面，作「返回」、「OK」等設定，操作更人性化，就算影相新手都識用。

睇相動畫得意

新機外形得意，內裏功能也極之搞鬼。選項介面的彩色圖案相當繽紛，除了有齊色調和光暗調校功能外，更與高階DC一樣，內置魚眼、模型和柔焦等數碼濾鏡，並支援720p高清拍片，功能齊全。最令人估唔到是音效和睇相功能都有搞作，前者可挑選快門和按鈕聲音，備有小狗、小雞和時鐘等9種聲效；睇相功能則備有Slide Show模式，可配上音樂和動畫特效，Cute到爆！