首爾實試 4G Optimus LTE串流韓劇冇Delay

LTE極速體驗

唔講唔知，原來現時有3種同名不同款的Optimus LTE，全因廠方因應歐洲、日本、韓國等地推出不同版本，雖然外表稍有分別，但最關鍵是支援LTE制式。小記實地以韓版新機配合LG U+網絡測試，發現接收極好，去到明洞、東大門甚至室內商廈，都依然收到4G訊號，平均下載速度更達30Mbps以上，快香港3G網絡幾倍，就算使用高清電視串流服務《U+ HDTV》睇KBS、SBS韓劇都冇Delay，好似播片咁順，香港絕對值得借鑑！官方表示，Optimus LTE於香港推出時，亦會支援現有的4G網絡，到時出街睇YouTube、下載Apps都唔使慢慢等喇！

IPS靚芒慳電

新機全球大賣，另一殺着是採用了4.5吋16:9 AH-IPS屏幕，解像度為1,280×720，最誇張是像素密度高達329ppi，睇網頁細小文字及圖示都極為清晰；加上顏色準確，睇相自然更逼真，難怪廠商將屏幕命名為True HD IPS。新屏幕亦比常用的OLED技術慳電，即場以專業儀器測試，發現OLED雖然於待機畫面的功耗較低，但顯示白色畫面如瀏覽網頁時，耗電量會激增；相比之下，新屏幕的平均耗電量更低，對於較「食電」的4G手機，作用更明顯。

售價：待定	於韓國使用LG U+網絡，平均下載速度有30Mbps以上！	內置《Easy Home》程式，可將圖示介面變大。

Digital Park花絮

除了龜尾市（Gumi）的LG Display總部，當然要去埋位於平澤市（Pyeongtaek）的Digital Park；內有Showroom擺放LG次世代產品，猶如博物館一樣！

3部機為不同地區推出的Optimus LTE，好易混淆。	試片區 LG U+網絡商提供《U+ HDTV》服務，行街時可以串流睇高清電視！	LG總部現場測試 用電子放大鏡細心睇新屏幕（右），明顯比OLED屏幕（左）細緻！
待機畫面時，OLED（左）會比較慳電；但正常使用則AH-IPS（右）屏幕慳電得多。	Optimus Tag主打NFC功能，透過Tag可隨時轉換場景設定。

同場加映：Optimus Vu 5吋新勢力

手機屏幕愈出愈大，繼Dell、Samsung之後，LG亦加入戰團推出5吋手機。有別於一般Smartphone，Optimus Vu的屏幕比例為4:3，睇高清片唔算太方便，但用來睇電子書、相片相當不俗。而新機主打繪畫功能，可透過附送的Stylus於《Notebook》電子記事簿程式，製作圖片、影片等附件；機頂另備有QuickClip實體鍵，按一下即可Jot Notes，方便快捷！

Optimus Pad LTE支援4G技術，平板產品中較少見。

Optimus Vu採用5吋4:3屏幕，推出日期及售價待定。

特派記者：林子聰

鳴謝：LG香港