Honor長氣袋傾足9小時

近年不少智能手機玩半日就No Battery，周不時要靠外置充電器「續命」。內地手機大廠華為（Huawei），便針對電量問題推出新機Honor，1.4GHz處理器、4吋大芒加埋Android系統，驟眼睇好似冇乜特色，查實新機特別換上1,900mAh大電池，足足比iPhone 4S的電量多33%，可傾足9小時電話，堪稱智能手機界的長氣袋！

售價：$2,880

1,900mAh 電量升級

Smartphone耗電量高，不少用家都會帶定個外置充電器傍身，Honor便可減省呢個煩惱，其電池容量高達1,900mAh，熱門手機如iPhone 4S及GALAXY S II的電池容量都分別只得1,432mAh及1,650mAh，單睇電量已經贏晒。實際使用時，官方稱新機可連續播放7小時電影、上網8小時，或者煲9小時電話粥，備用時間仲長達3星期，以後唔使成日搵地方充電啦。

4吋大芒 HDR影相

新機主打長氣，自然預各位用嚟睇片、上網，所以選用4吋大芒畀你睇得舒舒服服。雖然不是AMOLED或者SLCD屏幕，但整體色調自然、對比度不俗，而且可視角度大，幾個人圍埋睇YouTube短片都可以清清楚楚！除了用來睇片，新機影相亦有不俗表現，全因內置800萬像素鏡頭，有齊自動場景等設定外，最重要是加入HDR高動態範圍模式，遇到光暗反差大的環境就大派用場！唯一美中不足是機身不設實體快門鍵，篤芒操控較易手震。

白色機身完全沒有國產味道。

光面塑膠底蓋手感只屬一般。

機身厚10.9mm要扣分，好在弧邊設計幾好拎。

自家介面新鮮感十足

論外形，圓角銀邊的Honor略嫌平凡，幸好新機備有黑、白兩色之餘，仲可以另購粉紅、粉藍底蓋更換，睇落都有少少新鮮感。而實際操控時更見心思，預載自家HAP 5.1介面，鎖機、主頁、工作管理員等都經過重新設計，實用和美觀度提升不少；加上1.4GHz單核心處理器及512MB RAM的規格，用落流暢順滑，抵讚！值得一提是，新機繼續支援華為的雲端儲存Cloud+功能，備有16GB免費空間存放資料，付費版仲最高支援160GB，好用過《Dropbox》等軟件添！