羅可旋開放政策 子女自由行

人們常說「大肚的女人最靚」、「認真工作的人最有魅力」，羅氏針織後人「Bossini太子女」羅可旋（Victoria）集兩項最美麗元素於一身。即使捧着籮咁大個肚，仍堅持事事親力親為，全力打理自家服裝品牌生意，實在叫人敬佩。「屋企人成日教我要做事認真，要對自己做嘅事負責任。所謂不進則退，最重要唔好滿足於現狀，要不斷諗點做好啲。」

對時裝充滿熱誠的Victoria，曾獲最佳服裝大獎。	羅可旋的丈夫夏錦安非常支持她追尋自己的夢想。	Victoria斥資百萬元創立時裝王國，成為女士們的朝聖地。

成功不二法門

信念固然重要，但旁人總戴着「成功須『父』幹」的有色眼鏡，把她的成功歸功於家族的庇蔭。Victoria於2002年，在逆市的環境下斥資百萬元創立首間時裝店，就是由她父親羅蜀凱全力支持下才事半功倍。她亦坦言：「條路的確係易行啲！」但她強調父母並無傳授任何成功秘笈給她，並認為成功的不二法門，就是經驗的累積及知人善任。「我當然有試過喺家族經營嘅時裝店唔同部門幫吓手、學吓嘢，亦都有試過喺唔同嘅名店做買手，吸取經驗。而且做嘢唔係一個人做晒，要請唔同有經驗嘅人嚟幫你。」

腹大便便的羅可旋，仍然堅持親力親為打理生意。	羅可旋對第三胎又係仔，坦言有點失望。	羅可旋邀請樂基兒（左）及周麗淇（右）出席於北京舉行的時裝騷。

女強人的取捨

作為一個女強人，同時亦是三位子女之母，Victoria坦言必須要有所取捨。「我以前好多嘢都親力親為，不過依家都逐啲逐啲放低緊。我會繼續睇啲重要嘢，一定唔會完全唔理。」她笑言會略把重心放到家庭上，比重為六成家庭、四成事業。「平日起居飲食都唔使我照顧，因為有工人幫手，不過我會親自教佢哋做功課。無論工作點忙，我下晝都一定會抽時間同佢哋溫習、對功課。不過其實成績都唔係最重要，我係要教佢哋做一個做事認真嘅人。」

每每提起子女，Victoria的面上總流露着慈母的笑容，她亦坦言非常慶幸三名子女都十分生性，讓她很安心。「我大女好獨立，會自動自覺溫書同做功課，如果要默書，佢會自己打畀我，同我講一次要默嘅字，然後自己抄一次。一對孖仔就曳啲，成日都左耳入右耳出，鬧佢嘅時候仲嬉皮笑臉！不過我一定會好認真咁話佢，同埋要佢企喺naughty corner度罰企，等佢知道自己做錯！」

拒當怪獸家長

雖然家教十分嚴厲，但Victoria強調自己不是怪獸家長，絕不會強迫子女做不喜歡的事。以她自己為例，從小就對時裝抱濃厚興趣的她，會主動地留意潮流趨勢，當然亦會購買不同的衣飾，於身上隨意配襯。她認為這是天賦才能，即使後天培養，亦只能學懂理論，而不可能培養出對日新月異的時裝興趣。因此，面對着對時裝毫無興趣的女兒，雖然略感失落，但對她仍抱開放態度，讓她自由發展。「我個女鍾意數學、科學嗰啲，對時裝一啲興趣都冇，咁當然有啲失望，不過父母唔應該將自己嘅嘢放入仔女度。而且我仲有三個仔，仲有三個機會！」

仔女有別

本育有一女兩子的Victoria，原本打算收工，故此胎純屬意外，當照超聲波證實此胎又是仔的時候，她實在難以接受。她形容仔女好大分別，她認為兒子將來只錫女朋友，日後結婚，更加錫晒太太，不會再錫媽咪，反而覺得女兒比較黐家會錫媽咪多一點，雖然如此，Victoria始終很愛錫子女，無分彼此，這點絕對不用懷疑。

由女裝到童裝

Victoria看準市場需要，於2004年在港開設中價少女時裝店及2007年創立童裝品牌，其中少女時裝店深受年輕人愛戴，發展至今，分店已多達二十間！「其實喺街度見到有女仔着住我哋啲衫，又或者話好鍾意呢個品牌，我真係覺得好開心！所以更加推動到我要不斷改進！」她更於兩、三年前全力進軍內地市場。至於童裝，主要是：「起初都係因為我有小朋友，發現市面上冇乜又型、又中價嘅童裝，所以決定自己開拓童裝呢個市場。」

採訪：龔凱欣　攝影：黃叔榮