銀行一姐退下火線 王以智藝術再出發

被譽為「滙豐一姐」，從事滙豐私人銀行（瑞士）有限公司亞洲區行政總裁的王以智（Monica），本身已是一個了不起的人物，是出色的銀行家，而其家族亦十分顯赫，已故父親王國桐是第一代開創航運業的企業家，母親江文琤是一代才女，擅長寫電影劇本。退休的生活，Monica並不覺得空閒，她說：「以前專注工作，其他時間要分配，可能今晚做運動，明晚約朋友食飯、飲嘢，但依家可以一日做晒咁多嘢，而最近因為籌備慈善舞會，比較忙。」

加入演藝學院

Monica經前滙豐主席艾以敦介紹，擔任了演藝學院（APA）的Development Committee Chairman，為能讓大家更了解APA，她積極籌備一個慈善餐舞會，Monica說：「好多人都只知演藝喺灣仔，但有乜課程，除咗演戲，其他都唔清楚，其實佢有六間學校，有唔同類型嘅藝術學科，例如燈光、做戲、粵劇等等，係亞洲唯一一間咁全面藝術大學。」Monica今次舉行餐舞會，她表示已籌備了半年，現已進入尾聲，希望可以為APA籌得1,000萬元，然而現今這個市道，籌1,000萬元是否容易？她說：「好幸運有好多朋友支持，目標差不多已達到，香港有好多人都好慷慨，我知有不少大家庭每年都會捐一筆錢，視乎邊個機構受惠。」

王以智醉心舞台，因可引領自己進入另一個世界。	王以智熱愛藝術，而且擅長拉丁舞。	兩年前於APA慈善舞會上，王以智親自上陣，載歌載舞。

於工作中尋趣

眾所周知，Monica對舞蹈有濃厚的興趣，正確來說她對演藝藝術十分熱愛，如她所說：「舞蹈、音樂、歌舞劇等等我都好鍾意，我好鍾意舞台上嘅嘢，每當入到戲院、劇院，就會有期望，佢會將你帶入另一個世界，演繹另一個角色，雖然可能只係短短兩個小時，但你全程投入其中。」在事業上，她是成功的銀行家，但其實自小就熱愛藝術，問到為何不向這方面發展？她說：「我爹哋唔畀，我嗰個年代連大學都唔想畀我讀，覺得女仔讀咁多書嫁唔出，再幾經要求下，佢至畀我讀，但只可以讀有關科學嘅嘢，所以我要讀理科，同埋佢亦只係畀學費，其他嘅要自己搞掂，我大學時期都係半工讀。讀完書返嚟，爹哋覺得佢任務已完成，供你讀完書，你自己要照顧自己，所以搵工，就選擇了電腦行業。」雖然未能在藝術界發展，但Monica懂得在工作中尋找樂趣，從事銀行工作，她亦熱愛這份工，她說：「每份工作都有悶嘅一刻，但只要你投入積極去做，咩工都可以搵到樂趣，都可以有發展，只要你盡力去做。」

印度貧富懸殊，令王以智印象深刻。

王以智笑言退休後生活仍然忙碌。

做到老學到老

另一方面，Monica從未放棄藝術，而且擅長跳拉丁舞，她說：「我唔會停落嚟，人要不停學嘢，做到老、學到老，雖然冇年輕時咁易上手，但你不停學，一定都會進步。」Monica曾參加不少大型的跳舞比賽，被問到學了多久？她說：「我學咗大概十年，依家冇再諗參加比賽，學嚟自己娛樂吓，又唔係未試過比賽。其實我鍾意運動，但可能運動比較悶，令我更鍾意跳舞，依家每日都會花兩個小時做運動、跳舞、打泰拳等。」

嘆印度窮人難翻身

王以智現在除了積極行善，還不時周遊列國，以前去過不少大城市旅行，現主力去一些比較冷門的地方，上年就去過印度、土耳其、匈牙利、中東等等，其中印度就最令她印象深刻：「印度貧富懸殊得太誇張，有啲好窮、有啲真係好有錢，但窮人又好安於本分，不過我唔係好睇得慣佢哋好似你係邊類人就永遠係邊類人，你係掃地工人，永遠就係掃地工人，感覺好難過，因為人最緊要有希望，如果你積極去做嘢，起碼可以有應得嘅回報，但在印度這國家，好似不容易做到。」

為APA籌募經費

王以智將於五月三日舉行慈善餐舞會，屆時會有三百多人出席，她為了讓大家更了解APA，特別安排了一套短劇：「呢套短劇大概三十分鐘，仲會即場表演，APA六間學校嘅學生及已畢業生合力演出，想大家了解多啲APA的運作及課程。APA經費有80%來自政府及學費，而20%就要靠籌款，如果有多啲經費，就可贊助貧窮學生到外國參加比賽，或者加入平時冇嘅課程，例如請名師出席講座或教授幾堂，雖然唔會教太多嘢，但有時就係因為某一點便可觸動、啟發到學生。」

採訪：林麗玉

攝影：劉智源