三藩市直擊 MS Spring Showcase 體感搶打《重鐵騎》
Kinect體感操控唔一定只可於運動或消閒遊戲使用，原來Hardcore遊戲都用得着！Microsoft近日便廣邀全球媒體，出席在美國三藩市舉行的MS Spring Showcase活動，小記當然搶先體驗各款2012年遊戲大作，當中最矚目的是《Steel Battalion Heavy Armor》（重鐵騎），以體感加手掣操控機甲大炮上戰場打仗，臨場感一流！
體感配手掣
機迷應該都聽過或玩過2002年推出的機甲作戰遊戲《鐵騎》，當年在Xbox平台的畫面已靚得誇張，但因為要營造極像真的操控感覺，所以需配合大型操控桿玩，一般玩家都會嫌操作太煩及成本太高而錯過這隻好Game。事隔10年，新版《重鐵騎》結合Kinect體感加上手掣操控，將繁複的幾十個按鈕轉換成體感操控，例如可以用手凌空拉各個把手，操控機甲大炮活動；企起身時更可推開天窗，將手放在眼前便可睇望遠鏡；而手掣就用作控制前進方向同發射機關炮及導彈，玩落比當年《鐵騎》平易近人得多！
跟同伴互動
不過要學識體感操控機甲大炮唔係一兩分鐘嘅事，小記都要完成15分鐘嘅Tutorial先可以進入戰場，但時間絕對值得花！事關試玩版第一幕就係搶灘戰，面對遠方防衞兵的猛烈攻擊，即使裝甲夠強，但都感受到一步一驚心。而且畫面水準亦好高，硝煙跟爆破場景完全呈現眼前，唔少場面仲可於駕駛艙同其他同伴互動，完成任務後真係好有成功感；不過同玩《Kinect Sports》一樣，要付出唔少體力！
玩家意見
Thomas（奧地利）
「上一集的大型操控桿有成幾十個掣，操作唔容易，今次以體感令操作變得輕鬆；更抵讚係加入咗唔少跟同伴互動的場面。」
Alexis（法國）
「初次以體感方式進行Tutorial部分，確實需要時間學習，才可以完成各種操作技巧；試玩感覺係遊戲平衡度做得唔錯。」
同場加映：2012年新作率先試
《Fable: The Journey》聲控加強魔法
神級製作人Peter Molyneux親自介紹Kinect新作《Fable: The Journey》，佢話雖然以體感操作令人覺得動作成分較多，但其實新作係一隻RPG遊戲。試玩版分為兩部分，首先係體感操控馬車趕路，感覺相當真實；跟住要用雙手施魔法，左手吸起物件，右手出招。除咗儲氣加強力量外，原來仲可以透過聲控功能，大聲嗌加強魔法力量，認真有諗頭！
《Kinect Rush: A Disney-Pixar Adventure》同卡通角色遊玩
新作可以話係《Kinect Disneyland Adventures》的延續，同樣在主題樂園與經典角色一齊玩迷你遊戲，但今集既可同迪士尼角色玩之外，連Pixar的角色都有，好似可以進入「反斗車王」遊戲區同閃電王麥坤鬥車，大人細路都啱玩！
特派記者：布偉倫
鳴謝：Microsoft