潮影真我影子

衣櫃鏡影 靚衫逼爆

邊個話只有女生會買靚衫買到逼爆衣櫃？男生都可以！Billy自認是百分百貪靚鬼：「我喜歡時裝，絕對同本身嘅工作性質有密切關係。可以大膽講句，我鍾意打扮嘅瘋狂程度拍得住女朋友，屋企嘅衣櫃同鞋櫃都早已逼爆，連家人都大叫可怕。」Billy並沒有因此而停止買買買，反而愈來愈瘋狂，總之要襯衫照鏡Make Sure着到最靚先出門口。

工作美影 打扮昇華

小記數年前認識Billy，他當時於古着店任職店長，每天都同古着牛仔褲、美式軍褸及靴子等做朋友，成為名副其實的古着友，由頭到腳都是爛Tee爛牛。

Billy無時無刻都影影影，但自言一點也不覺累。

一件藍色西裝褸可以有很多配搭，若襯恤衫立即變斯文。

直到現在，他轉投到名牌服裝店工作，所接觸的服裝種類大大不同，究竟對他影響有多大？他說：「在不同品牌及環境工作，的確獲益良多，增進不少時裝知識同配搭心得。我喜歡High-end時裝，同樣喜歡古着服飾，因為我不是一味盲目追求名牌的人，識得新舊配搭先更有味道。」

吊帶襯Tee及牛仔褲，散發男生的調皮感覺。

在小記要求下，Billy以四眼仔真面目示人，幾有型。

愛情甜影 女友力撐

作為時裝人當然會捨得花錢買衫，但花錢的同時難免會被身邊的人，特別是另一半「哦」一大餐。幸而，Billy的女朋友同是時裝愛好者，不僅沒有反對，反而互相支持，更齊齊影Snap 晒幸福，簡直係天作之合。

Billy於數年前開始收集各式各樣的古着Tee，如今已有過百件，相中只是其中一小部分。	煲呔、手鏈及手鐲都是Billy的心頭好，缺一不可。	有無發現Billy絕大部分街頭Snap都是戴黑超？他教路：「戴黑超會更Cool。」

Billy說：「影街頭Snap對我來說早已成為生活的一部分，而我同女朋友出街或旅行，都總是相機不離身，你幫我影、我又幫你影，咁已經好滿足。」他更補充其街頭Snap相簿，大多都是出自女朋友之手呢！

心底倒影 忠於自己

Billy對於自我的評價相當謙卑：「我唔覺得自己着得時尚，亦唔覺另類或浮誇。着衫扮靚，基本上唔係要人哋讚，而係要忠於自己，總之自己着得舒服先至係最重要。」完全認同，着衫是為自己，不是為別人，讚！

撰文：黃秀敏

部分攝影：林資凱