DOCOMO F-06D 美白瘦臉氹女友

情人節就快到，若然仲煩惱緊買甚麼禮物氹女友的話，手機是不錯選擇。當然，今時今日小記不會再叫大家送iPhone 4S咁行貨，要送就送新鮮到港的日系手機DoCoMo F-06D，事關波點機身配同款Tote Bag，已經秒殺一眾少女，再加埋美白、瘦臉等全套貼紙相「分唇」，女友收到好難唔嗌Kawaii！

售價︰$5,380

送波點Tote Bag

東瀛手機一向冧女，若閣下的女友是可愛教主，情人節送F-06D就至啱；除因為它沿用日系摺機造型外，藍色外蓋還印滿粉紅波點，配合大大個立體蝴蝶結，驟眼睇猶如鏡盒般精緻。此外，日本雜誌最愛隨書送禮物，新機既是為日本少女雜誌《nicola》創刊15周年而推出，跟機亦送同款Original Tote Bag，袋身以尼龍製造，樣靚又襟用！手機Theme亦有《nicola》主題，一款藍底白點，一款黃底加花形圖案，由內到外都咁「卡娃兒」。

全面美顏功能

少女愛自拍，新機的810萬像素鏡頭旁印有「LOVE & SMILE」字款，自拍時好難唔笑容滿瀉。而影相美顏功能由日本帶起，F-06D更來個強化，除了標準的大眼仔、瘦面及美白外，還可以更改眼角弧度及額頭闊度，上鏡自然更甜美；若仲未滿意影相效果，系統更容許大家微調各項美顏數值，毋須去美容院都可容光煥發。特別一提，跟機送一支唇膏形Stylus，支援篤芒功能之餘，仲可於貼紙相模式下畫公仔及點選相框圖案，讓女友發揮創意。

外蓋設有單色屏幕，方便睇來電同時間。	鏡頭旁印上「LOVE & SMILE」字樣，影相都開心啲。	雖然手機防水，但落水前記得鎖緊電池蓋！
提供美顏、運動及風景等多個場景模式。	內置《太鼓之達人》等Kill Time小遊戲。	附送尼龍Tote Bag，跟手機同色同款。

防水30分鐘

新機並非Smartphone，雖然規格和介面較為一般，但卻有不少功能勝過入門智能手機，例如屏幕可變成鏡子、內置計步器計算卡路里消耗量等，最吸引是對應IPX5/8防水標準，可於1.5米水深運作30分鐘；另支援720p高清拍攝、一笑即拍及ISO 12,800超高感光度等。制式方面，手機由DoCoMo推出，自然沒有SIM卡鎖，保證香港用得到，惟要留意它採用microSIM卡槽，換卡較為麻煩。而電池容量僅有820mAh，3G通話時間連4小時都冇，愛煲粥的話未必夠用。