5年前改編自漫畫的《The Darkness》遊戲叫好又叫座，由故事背景、系統設定到敍事風格都好「黑色」，開創咗一條自家的黑色FPS遊戲路線。到今個星期推出的第2集《The DarknessⅡ》，自然有咁黑整到咁黑，潛藏黑幫的主角，體內的黑暗力量再度爆發，除咗可以雙手拎武器攻擊外，仲可以操控兩條惡魔手臂，殲滅狙擊佢嘅黑幫，玩法夠晒另類！
細膽嘅玩家相信會畀《The Darkness II》嚇一跳，失驚無神爆頭、突然畀人伏擊、子彈橫飛畫面成日出現，如在已供下載嘅試玩版中，玩家便要睇住自己釘十字架，食食吓飯同靚女傾偈時中伏，畀人拖住走佬都要開槍對付仇家，夠晒驚險！今集故事繼承番上集大綱，講黑幫主角Jackie Estacado藉住體內的黑暗力量，報咗女友被殺之仇後，今集再捲入大規模黑幫仇殺中，想當然黑暗力量會再度加碼。
稱得上黑暗力量，自然要在黑暗環境使用，這樣才能在雙手拎住唔同武器時，控制多兩隻鬼手，發揮到今集獨有嘅四臂亂舞「Quad-Wielding」玩法。這雙鬼手可以做到砍殺、舉起敵人，甚至拋擲動作，加上原有雙槍攻擊，將FPS同Action遊戲兩大優點融合，玩法絕對新鮮。遊戲仲有埋其他超能力，好似可使出「Black Hole」招式，製造出一個黑洞睇穿牆，但要用Dark Essence才能買到。點先可蒐集Dark Essence？攻擊敵人取出心臟便可，接受得到嘅話仲可以食埋「家明」增加更多Dark Essence添！
《The Darkness II》驚險、血腥、恐怖兼而有之，另一抵讚係遊戲電影感極強，鏡頭運用唔止喺眼平視線，例如畀人拖行時頭傾埋一邊，連遊戲畫面都會傾斜顯示，幾考大家嘅方向感。雖然遊戲故事主要從主角Jackie第一身出發，如想玩遊戲嘅支線，便可以玩埋跟主軸故事平行發展嘅4人協力Vendettas模式，4位連線玩家各自操控擁有唔同黑暗武器嘅人物，重新體驗各個殺戮時刻，值得一玩再玩。
類 型：第一身射擊FPS
開 發：Digital Extremes、2K Games
平 台：PS3、Xbox 360、PC
推出日期：2月10日
售 價：$449（PS3）、$419（Xbox 360）、$359（PC）
查詢電話：2290 9333
撰文：布偉倫