Series 7 Chronos SSD勁‧鋁

想買部超薄兼規格強勁的手提電腦，當然要付出代價，正如Samsung早前推出的13.3吋旗艦級Series 9機種900X3A，機身僅厚16.3mm，但開價要近$15,000。想玩得經濟少少，可考慮這部新出的Series 7 Chronos NP700Z3A-S02HK，採用14吋屏幕、鋁合金機身兼落齊頂級硬件，再加入8GB SSD加快儲存及提升開機速度，外形與功能兼備，最緊要係售價低過萬元的心理關口，值得諗諗！

Samsung Series 7 Chronos NP700Z3A-S02HK 售價：$9,980

23.7mm鋁合金機身

這一年間，Samsung推出超多數碼產品，要認清每件產品的特性都唔易，如早前的Series 7 Slate PC二合一平板電腦，名字同今次的Series 7 Chronos有點接近，但後者卻換成手提電腦。新機在外觀以至定位，都帶有MacBook Pro的影子，不過兩者用上唔同系統，客路唔同，各有各做。設計方面，新機外殼以鋁合金製造，觀感與質感兼備，而且機身在內置光碟機的情況下，厚度能做到23.7mm咁薄，重量亦只有2.07kg，唔算重。

14吋高質Max Screen

Series 7 Chronos比MacBook Pro設計更先進的地方，是採用「Max Screen」技術，能將顯示屏邊框壓縮至最小，提升視覺觀感的同時，亦能在同一Form Factor下，裝配更大顯示屏，如這部手提電腦在原本只可放入13吋屏幕的空間下，偷薄邊框引入14吋屏幕。更難得係顯示質素甚高，支援1,600萬色及340nit亮度，較一般手提電腦的屏幕更靚；配合AMD Radeon HD 6490M獨立顯示卡，能應付全高清影片播放，只是稍嫌黑位未夠實黑。手提電腦的音色表現，亦透過SoundAlive技術得以提升，音效表現具臨場感。

機身以鋁合金製造，質感跟觀感一流。

配備背光鍵盤，在較暗環境下會自動亮起背燈。

連接端子算得上齊全，備有HDMI、USB 3.0、LAN等。

開機快電襟用

SSD的存取速度較傳統硬碟為高，只是SSD價錢高昂，要以SSD全面取代硬碟定必貴好多。新機採用較折衷的方法，既內置高容量1TB硬碟，亦在主機板加入8GB 「ExpressCache」 SSD，可為應用程式和讀寫資料加速，更有效加快開機速度，比正常Notebook進入視窗快約45%。其他硬件還包括Core i5處理器、6GB DDR3記憶體等高檔規格，但小記揀機比較留意電量表現，今次新機亦交出亮麗成績，內置的8-cell鋰電最多可用到8小時，足夠工作或娛樂所需，而且藉着Samsung Battery Life Plus技術，令電池在充電1,500次後，仍可保留到80%電量，夠玩幾年唔使轉款。