行勻全港高海拔吸福氣

海拔393米 全港最高觀景台

玄學家指出，新一年前往高地有步步高陞寓意，首選當然去位於香港最高大廈環球貿易廣場的「天際100觀景台」。作為全港最高的室內觀景台，這裏被落地玻璃包圍，歎住冷氣便可輕鬆在海拔393米高的環境睇盡香港360度全景，近至維港、遠至迪士尼樂園都望到。最過癮是在極高的俯瞰角度下，幾乎全部建築物都變成模型咁細，新年居高臨下夠晒氣勢！

師傅教路 必玩福運擺設

既然上到100樓咁高，當然唔會只得睇景咁簡單，場地喺楊天命等師傅的指導下，擺放多個福運擺設，包括3.5米高的巨型金樹、圍繞全場的千呎金龍，立體龍頭仲鋪上真金箔，金光閃閃勁好意頭，影相必Check！福運擺設不僅睇得，原來仲玩得，因為場地在適當方位，擺放了象徵健康平安的金葫蘆、寓意學業進步的金毛筆和書卷、增強人緣的桃花樹，以及金算盤和金元寶等，每樣擺設都有獨特的開運玩法，好似旋轉的桃花樹擺設，據講順時針行一圈便可增強新一年的人緣，龍年定可人氣爆燈。

龍頭以立體設計，仲鋪上真金箔，勁神似。

算盤的算珠以黃晶打造，掃一掃寓意打響如意算盤。

其他登高推介：海拔482米 寶蓮襌寺 睇大佛

不少人於農曆新年都會吃素菜和到廟宇上香，咁就要到逾百年歷史的寶蓮禪寺吸一吸靈氣，除了有韋馱殿、彌勒殿和萬佛寶殿等特色建築，還可近距離欣賞坐落於海拔482米的木魚峰、全球最大的戶外青銅坐佛「天壇大佛」。行到攰的話，可到大雄寶殿旁的齋堂，吃一頓素菜午膳和馳名山水豆腐花等。雖然昂坪360纜車要停駛數天，但各位仍可於梅窩碼頭或東涌港鐵站轉乘巴士前往，值得一遊。

身處海拔393米高，建築物都變到好細，想睇清楚就要靠電子觀景器。

葫蘆代表健康，金鈴則屬金，搖搖響鈴寓意化病星、保健康。

用膳資料

開放時間：11:30am~4:30pm

地點：寶蓮襌寺大雄寶殿左邊的齋堂

查詢電話：2985 4736

海拔396米 凌霄閣 維港景最靚

登高唔少得行山這有益身心的活動，郊遊首選當然是太平山山頂。撞啱新正頭，山頂纜車通常會大排長龍，倒不如由上環出發行大運啦！由大學道出發，經過克頓道後，便可進入山頂環迴步行徑上山頂。當中有兩條路徑，夏力道平坦易行，可遠眺南丫島風光；盧吉道則可飽覽維港景色，大約1.5小時便可以順利抵達海拔396米高的凌霄閣，仲唔會身水身汗添！

離地100米 氫氣球 飄浮空中

若然真係想升上高空，但又覺得海拔幾百米太高的話，大可改玩西九龍長廊的DHL香港氫氣球，最高可上升至100米，雖然相比起昂坪、山頂唔算太高，但勝在可以近距離睇晒西九景色。整個旅程需時約15分鐘，一個氣球最多可乘載30位乘客，一於五代同堂步步高陞！

開放時間：10:00am~9:30pm

地點：西九龍海濱長廊DHL香港氫氣球

費用：$150（成人）、$75（小童）（10:00am~5:30pm）；$250（成人）、$175（小童）（6:00pm~9:45pm）

查詢電話：2559 2944

DETAILS

日期：即日起至1月31日

開放時間：10:00am~10:00pm

地點：港鐵九龍站環球貿易廣場100樓「天際100香港觀景台」

費用：成人：$125（網上預售）、$150（即場門票）

小童及長者：$90（網上預售）、$105（即場門票）

查詢電話：2613 3888

撰文：林子聰

部分攝影：譚建章