新春拜車公 祈福好輕鬆
今日係年初三，大部分香港人都會揀呢日拜車公，其實年初二先係車公誕，但中國人認為初三係赤口，唔適宜拜年，於是順理成章就去拜車公喇！不過徐雲政師傅話今年拜車公，初五先至係好日，最佳拜神時間係上午7時至9時，同埋中午11時至1時，校啱時辰轉好運，就可以行運一條龍！
唯獨沖蛇
每年年初三大圍車公廟，都肯定人頭湧湧擠得水洩不通，警察更會封路實施人流管制，所以今年一於聽徐師傅講，初五先去拜，咁就唔使同人逼餐死，不過當日唯獨沖肖蛇者，所以蛇人要避一避，其他生肖就無有怕，可以跟住徐師傅教路，逐個步驟做，祈求順風順水，年頭行運到年尾！
第一步 OL買車公衣寶
拜車公的首要準備當然係一份車公衣寶，當中最好包括車公衣、百貴人、長祿貴人、富貴袋及百解等，當然唔少得三支大香及一紮細香。價錢由幾十蚊至超過三千蚊一份都有，豐儉由人，師傅話買衣寶同香燭都係隨心，有能力的話，就買貴啲，一般平民百姓，買最平嘅都無所謂！
第二步 買風車
入到車公廟，門口旁邊就有風車賣，風車款式年年都差不多，不過價錢就逐年增加，今年最平都起碼28蚊，最貴的風車有成個人咁高，價錢梗係貴喇！
第三步 填寫姓名及祈求
點香前，要將車公衣寶準備好，最重要喺上面寫清楚姓名、出生日期及住所地址，等車公知道你係邊個。如果已經有清晰目標想祈求，就可以即場寫埋上去。
第四步 火爐點香
為安全起見，廟內唔可以自行生火點香，所以廟兩旁都設有點香區，一大班工作人員會幫手點香，火爐火力亦夠晒猛，所以很快就可以點起香燭。點香區工作人員會問你添唔添香油，無強迫成分，善信絕對可以隨心。
第五步 誠心上香
點完香可去正殿前面的香爐區上香，記住先上三支大香。拜時要向車公稟明姓甚名誰、出生日期同埋今年想求咩。再於其他細香爐各上三支細香，再入正殿上三支細香。
第六步 風車要順轉
最後當然係轉風車、打天鼓。徐師傅話最好先轉風車催運，後打天鼓，而女仔要用右手向順時針方向轉，男仔就用左手，轉一下就夠，祈求新一年順境，好運順勢轉來。
求籤問卜
基於安全同環保，好多廟宇都已經無火爐畀善信化寶，車公廟內放置好多聚寶車，善信只要將車公衣寶放落去，職員便會幫你化寶。化寶之後，若覺得仍然有煩惱，想求籤問車公的話，就要準備20蚊按金向廟宇借籤筒，求完之後畀5蚊攞一張籤紙，想搵師傅將籤文解得清清楚楚，就要畀多10蚊解籤費用。
車公誕歷史
據說明末崇禎年間，新界各地突然疫症流行，死亡者眾多，尤以沙田為甚，後來有人翻查史書及縣志，發現宋朝有位車大元帥，平亂有功之外，更能遏止疫症，沙田村民於是請人塑造車大元帥嘅肖像，在沙田建立一間車公廟，廟成之日據說疫症就開始減弱，從此村民深信車公顯靈，決定將每年年初二定為車公誕，慢慢再演變成香港人新年習俗。
金榜題名
讀書人求車公，就一定要到廟內攞張祈福紙，將自己姓名、出生日期及心願寫上去，然後貼喺金榜題名嘅版區，之後隨心添啲香油，以表示敬意，車公就會特別保佑你頭腦精靈，學業出色，文昌運亨通。
催財風車擺正西
今年拜完神之後，風車攞返屋企，徐師傅（右圖）話如果想催財的話，就要放喺家中正西位，想催旺姻緣的話，就要放喺東北位，想催旺事業的話，就要放喺正南位。
記得帶卡還神
年頭同車公許下心願，記得年尾帶埋張車公大元帥的開光保佑卡還神，再加上一對還神花，表示酬謝神明全年護蔭。
撰文：鄧竹君 攝影：張錦昌
鳴謝：玄學顧問徐雲政
模特兒：Venus、Koyuki@Talent100