Honda Stepwgn 2.0 SX Dynamic型合年輕家庭

七/八人車的優點唔只空間大、載得人多，仲要愈出愈型仔添！最近，本田（Honda）為Stepwgn車系加入了2.0 SX Dynamic版，實用性依舊，但外觀方面就加入了頂置尾翼、日本Modulo裙腳及運動化合金輪圈，成部車相當Sharp醒！目前，Stepwgn已獲政府認可為環保汽油私家車，可享稅務寬減，連天窗、電趟門及全車皮椅等設備都係賣$299,880，對於後生家庭用家嚟講，不失為理想的上車盤。

售價：$299,880

全新慳油機制

揸得MPV，都預咗要載屋企人周圍去，平日要送仔女返學、假日又要去街，如果部車「大食」，肯定入油入到窮。目前在港出售的Stepwgn均搭配2公升直四i-VTEC引擎，最大的馬力、扭力分別為150ps及19.7kgm，性能算不上強勁，但在本港使用還是綽綽有餘。另外，引擎導入全新活門操作機制，處於低負荷狀態時，生氣活門會延遲關上來減低引擎的燃油量，配合波箱油加熱裝置及「ECON」模式，平均油耗（以日本10.15行駛模式計算）可低至14.2km/L，計落都係$1.2/km。

座椅變化靈活

Stepwgn 2.0 SX Dynamic的座位以2+3+3布局，座椅鋪排靈活多變，只要將後座收藏在地台底部，便可輕易打造出平整地台，若再將中排座椅推前，騰出的空間足以擺放兩部大型單車。相對於歐洲出品，日系MPV的設計往往較細心，而且更符合港人口味，Stepwgn除擁有同級最低的390mm低地台外，中排座椅還引入一按式摺合設計，配合獨有的一梯級式地台及雙電動趟門，乘客進出車廂相當便利，長者及小朋友上落更為安全。

放大圖片	車廂空間頗寬敞，後排也有不錯空間。

Smart Key好方便

Stepwgn的車長接近4.7米，但操控及睇位都非常容易，其最小迴旋半徑只有5.3米，加上左邊三角窗設有輔助鏡，可反射左邊車頭的盲點位，駛進超窄停車場都冇有怕。相信唔少車主都試過抱住小朋友或大件行李時，冇手防盜器的情況，為解決這個問題，Stepwgn加入了Smart Key自動感應門鎖，不管把遙控車匙放在手袋或褲袋都不成問題，只要站在車旁及輕按手把上的按鍵，便可啟動兩側電動趟門，方便至極。