自從有咗iPhone後，平時已甚少用DC影相，連近期影聖誕燈飾和商場都可「以App代勞」。不少人疑惑iPhone影聖誕得唔得？其實iPhone 4影相本身已經好有水準，到4S時表現更靚，配合大量新Photo Apps，加入公仔裝飾和特效都易過借火，影完Moody聖誕相仲可即傳上facebook博人Like，DC仔真係唔夠玩呢！
售價：免費（12月限時優惠）
可以一出就打入Free Download三甲位置，足證《PowerCam》功能夠好玩。雖然這App並無聖誕主題功能，但卻加入超大量濾鏡，如Moody的Neon霓虹燈特效、Shine B閃閃令特效等，甚至連移軸鏡都有得玩，影聖誕相勁啱用！最正係唔止影相用得着，連拍片都一樣可以加入特效，12月內更可免費下載，方便大家於聖誕Party喪影！
售價：免費
唔少App都可以為相片加公仔裝飾，但一般都幾兒戲，反而食正聖誕Timing的《White Christmas》，就由操作介面、功能同成像都好夠氣氛，如功能Icon全都轉為聖誕裝飾，一按左上角的鹿頭即可開補光燈補光，按正上方的聖誕樹就可以畀大家在畫面加入聖誕裝飾；按右下角的雪雪就可畀大家控制畫面飄雪的大小、形狀同下雪密度，使用時好窩心。
售價：0.99美元（折約港幣$7.7）
唔知大家有冇影過那些年的半格相，即係一格菲林可以影到兩張相，慳番唔少菲林錢。《HalfCamera》的介面設計便似足半格相機，「機背」還設有Film Counter畀大家睇番用剩幾多菲林。雖然特效欠奉，但最抵死係相片會用整條菲林顯示，影完一條12格菲林後，就可「沖曬」出來放在「照片」內，1蚊美金都幾抵玩。
售價：免費
《MagicalLens》係一個Key相App，將所拍攝到的人樣Key在預設主題相上，概念唔新，但叻就叻在程式會自動幫主角Tune色和調整光暗度，令佢更完美地Key在主題相上。不過預設免費版只得懷舊飛機師、肥仔、印第安女人3張主題相，想玩聖誕特別版如戴聖誕帽的蒙娜麗莎，就要畀多1.99美元先玩得到啦。
撰文：布偉倫
部分攝影：盧展程