Dickson Yewn開珠寶盒說故事

引子──愛電影但棄拍戲

Dickson的家族在中環開設著名珠寶店，順理成章成為珠寶設計師是很正常，但是，原來現在的一切都是來得曲折離奇！

Dickson說：「其實我當珠寶設計師的經過是非常轉折，我本身第一志願是電影、第二志願是純藝術，做了四、五年所謂的『Artist』。畢業後，去了Teddy（泰迪羅賓）的電影公司工作，原本想做編審，但Teddy覺得我在藝術方面的發揮較好，所以便轉做美術指導。」

「不過，只開了一套戲之後就冇乜戲開，所以又轉去廣告公司做。後來，漸漸發現愛電影同做電影是兩回事，可能係藝術家脾氣，我比較鍾意個人工作，但電影是群體工作，所以不太適合我。」

伏線──富家子過窮生活

所謂人生如戲， 雖然Dickson不喜愛電影工作，但其奮鬥故事就好似電影劇情，富家子捱窮度日，終於憑個人努力闖出一番事業。他現已是本地著名珠寶設計師，其概念珠寶店life of circle更於2005年被美國《福布斯》（Forbes）國際財經雜誌選為全球二十五間頂尖商舖之一，與MANOLO BLAHNIK及RALPH LAUREN等齊名。

「不要以為我屋企做珠寶我就有甚麼Fringe Benefit。其實我自己一早已搬出來住，更在重慶大廈住了好多年。我在1995年做藝術工作時已開始設計珠寶，可能是與生俱來，加上去過外國，見到好多靚嘢，當時覺得設計珠寶是很容易。後來做了好多份工都搵唔到食，之後在珠寶公司工作，發現原來珠寶設計頗適合我，於是開始珠寶設計事業。」

轉捩──中國風與現代瘋

Dickson的設計一直滲透強烈的中式風格，他自言並非刻意，但因從小喜愛鑽研中國歷史及文化，於是慢慢就吸收下來。「香港有大部分人都是半中半英，兩樣都唔得。我們這些70後，在後生仔時當然睇好多英雄歷史，讀中國近代史時覺得喪權辱國，產生『救國救難』的思想，加上細個時好鍾意同四、五十年代出身的人相處，不知不覺下受這風格影響。」

中國近年已成為全世界奢侈品的最重要市場，各大品牌爭相推出中國風產品，對此，Dickson有很強烈反應。「我絕對要澄清同希望傳媒幫幫手，搞清楚外國人做中國嘢同中國人做中國嘢的分別，例如你叫法國米芝蓮大廚Robuchon炒揚州炒飯，點都唔會好食過你媽咪煮。外國人加條龍就叫中國文化，拿着一些中國元素就叫中國概念中國風，千祈唔好用這種字眼，這是西方的Perspective，我們被太多外國雜誌洗腦了。」

高潮──設計師做好導演

既然是新世代，Dickson就以另類方式「救國」、發揚及推廣中國文化、訴說不同故事。「家我們品牌的理念好鞏固，慢慢將中國冇嘅嘢變有，希望將傳統工藝品例如石雕、木雕、首飾、衣服等保留及當代化。當然，我做唔到咁多範疇，所以選擇用最熟悉的珠寶首飾當代化及作出宣揚。」

雖然Dickson當不成電影導演，但正如他說，是另一種導演。「我覺得自己家似導演多過設計師，最初做電影都是想講故事，但有好多人講得好過我。後來我去紐約進修珠寶設計，認識不少出色的中國新進藝術家，我想講的故事都被他們講了，更講得好好，所以我想嘗試其他人未試過的方式，最後決定以珠寶講不同的故事。」

待續──細力量盼大理想

Dickson現時擁有兩個品牌，life of circle及YEWN，前者走較時尚及現代化的路線，後者走高級Fine Jewellery路線。他在去年取回life of circle代理權，究竟又有甚麼大計？「當初將life of circle賣掉是因為自己不是商人，發展得太快未能管理。但現在的心境好唔同，一位老師曾送我一本書，講及『大德若隱』，我這兩年的心態就是『收』，慢慢做，消化好，做好根基，細的力量不比大的差，細而精可能更有影響力。」

他更說：「我好鍾意上海一間名為《Spin旋》的小店，店內賣的產品是以中國設計為主，覺得好Inspiring，我有個想法，就是將當代中國奢侈品，不同級數不同範疇集合一起，結合中國前線力量，雖然這個理想真係好難，但我都好想做到。」

撰文：朱寶茵　部分攝影：林資凱