英倫Mama烤雞

英倫風趣幽默

來到The Chicken Man，黃色的「Sharp醒」門口，有個大大的男人Logo，細心一看，男人的兩撇鬍鬚竟變成兩隻雞髀，好搞鬼！走進去，右邊牆上的黑板，寫滿各式雞饌；另一邊就掛滿以「雞」為主題的漫畫，幅幅都好得意，令人會心微笑。餐廳主角位於前方——是烤爐！看到一隻隻雞邊烤邊轉，定時香噴噴出爐，已教人食指大動。老闆David說：「外國有好多輕鬆Casual的Deli，香港卻少之又少，所以我希望大家可以在這裏一邊吃雞，一邊度過悠閒星期天，順便感受一下英倫風情。」

媽媽秘方

設計以雞做主題，吃的當然也是雞，而主打中的主打，是烤雞。烤雞的Recipe來自David的媽媽，由曾於美國5星級酒店工作的大廚Karen主理，以家庭式的秘方炮製，選用時間長、花心機的「濕醃」法，即是將雞隻放入濕的醃料中醃過夜，這樣雞肉保持水分之餘又入味，即使經過1小時烤製，依然保持嫩滑，就算攤凍食仍然好Juicy。這裏有兩款雞供選擇：澳洲走地雞每隻重1.5公斤，肉質較嫩，而且不含賀爾蒙，天然健康；巴西雞只重1.3公斤，雞味濃，但不及澳洲走地雞滑，Size不大，價錢亦較便宜，適合兩小口享用。

招牌原隻焗雞（巴西雞） $120/隻，$65/半隻 以英式家庭Recipe製作，雞肉富雞味，配英國燒汁最惹味，只要加$20即可多試1款醬汁。

Karen每天都會於下午5至6時將「新雞」入爐，想食烤雞最好校啱時間。

烤雞會跟1款醬汁，有傳統的英國燒汁、惹味的德州BBQ汁及辣味Venti-Venti等共5款選擇。「我想將家裏的烤雞發揚光大，希望大家會鍾意！」David說。餐廳每天上下午都會烤雞，下午5時開始烤，想食新鮮出爐烤雞就要預準時間！

秘製雞肝醬伴紅酒焦糖燴洋葱配多士 $60 自家製雞肝醬可用來塗多士吃，甘香豐腴，甜甜的洋葱可減輕膩感。	季節生果燕麥脆脆 $29 燕麥脆脆即Crumble，牛油味十足，更會配上時令生果，帶來不同味道。	雞絲伴西芹蛋黃醬三文治 $25 雞絲以蒜片炒香，加入蛋黃醬及西芹，以自家製麵包夾着吃，味道很豐富，不少人都以它作為Quick Lunch。

滋味輕食

除了烤雞外，這裏同時供應多款輕食；甘筍薑汁湯味濃，入口慢慢滲出薑味，似屋企湯一樣咁Warm；雞絲伴西芹蛋黃醬三文治好豐富，最啱當作Quick Lunch；還有媽媽秘方的季節生果燕麥脆脆、清新凱撒沙律、人氣鮮忌廉薯蓉……我覺得雞肝醬最正，入口好香滑，洋葱香甜，伴多士吃，歐陸Homefeel滿瀉。此外，這裏有多款套餐，由1人至10人分量都有，逢節日更會推出特別套餐，這個聖誕，不妨以英式烤雞代替傳統火雞！

希臘沙律 $25（細）、$50（大） Feta Cheese、羅馬生菜、紅洋葱及青瓜等以檸檬汁、蜜糖和香草拌勻，清新鮮爽中滲透奶香。

牆上掛上多幅以雞做主題的漫畫，有趣。

撰文：蘇瑞霖

攝影：胡淑儀

地址：西環西營盤高街72號恒陞大樓地下11號舖

查詢電話：2559 2190