RAZR XT910 7.1mm防彈特務

睇親特務片，男女主角必定有神奇武器跟身，蠱惑的槍、太陽能電筒全部嚇你一跳，勢估唔到原來Gadget界都有特務手機，講緊嘅係Motorola年度大作RAZR XT910，不但厚度只有7.1mm，薄到放喺衫袋都唔覺，背板更採用防彈纖維及防水濺鍍膜打造，咁強嘅手機，$5,000有交易！

售價：$4,988

夾心餅般厚

雖然摩記近年憑Milestone系列翻生，但講到經典手機，剃刀RAZR才是表表者。今次RAZR XT910正要向經典致敬，當中最大亮點是維持激薄設計，內部零件在裝嵌時採用了層壓式技術，環環緊扣，成功令機身偷薄至7.1mm，不但數字上薄絕智能手機界，驟眼睇仲同塊夾心餅差唔多厚。難得的是，金屬外殼原來透過鑽石切割得來，極輕、極光滑，配合微曲背板，即使搭載4.3吋巨芒依然Fit晒手形！

防彈衣物料

叫得做特務手機，得個薄字又點夠，新機另一特點是夠硬，先不說屏幕選用Corning Gorilla強化玻璃打造，無懼硬物刮花；其背板更加入KEVLAR纖維材質，此物料應用於防彈衣上，在同等重量下，其強度比鋼絲高5倍！雖然現在用來做手機，只有一層未必擋到子彈，但卻能大大增強手機耐用度，小記試過用鑰匙猛刮機身都絲毫無損。而手機屏幕、背板皆有納米鍍膜保護，最誇係連電路板都經過防水塗層處理，落雨都唔怕！

預載MOTOBLUR介面，提供5版首頁。

背板是KEVLAR防彈纖維，硬得來有手感。

一體成形設計，microSIM及記憶卡槽設於機側。

自動連鎖反應

跟舊版RAZR得個樣唔同，新機已升呢使用Android 2.3系統，配合1.2GHz雙核心處理器及1GB記憶體，轉頁、睇Flash都極快，Benchmark得分更比很多同級手機優勝，相信廠商做過不少優化。介面則採用自家MOTOBLUR，首度內置Smart Actions智能模式，它能設定手機在不同場合作出連鎖反應，例如回家時自動發送SMS及調低音量，或一插耳機即進入播歌模式等，用戶可自行設定觸發條件，令手機管理更人性化。