短短3年間，App Store的軟件數量已超過50萬；要在芸芸Apps中搶灘，未必要鬥新、鬥創意，懷舊同樣是好招數。近排最多人談論的肯定是一度為人淡忘的《ICQ》，70、80後的朋友紛紛將它谷上Top Free榜首。今次小記就尋回「那些年」盛極一時的程式和遊戲，讓大家回味一番！
90年代手機SMS尚未普及，同朋友Chat就要靠Instant Messenger，《ICQ》、《AIM》等更屬當年必裝軟件！
各位仲記得「喔噢」這經典聲音嗎？沉寂多年的《ICQ messenger》近日於iPhone翻生。用家可以透過ICQ「冧把」搵朋友，更支援舊帳號通訊！若嫌記數字麻煩的話，新App仲可以像《WhatsApp》般以電話號碼登記，擺明搶客！雖然新App暫時未能傳送檔案和相片，但已整合聊天室等功能，都算實用。
當年《ICQ》紅遍全世界，同期另一隻IM軟件《AIM》則主攻美國用戶。無獨有偶，《ICQ》翻生之時，《AIM》亦重現於iPhone。雖然經典的人仔Logo不見了，但卻加入大量新功能，如傳送檔案、地圖，更支援Group Chats，實用程度不亞於《LINE》等軟件。惟要留意，暫時此App只開放予US Store！
早期PC主要用作文書處理，不少人忙裏偷閒只得玩Windows內置的小遊戲如接龍、踩地雷等。
舊陣時線上遊戲尚未普及，解悶消閒最方便是進入Windows「遊樂場」。新App便將經典的「接龍」遊戲轉移至iPhone，雖然換上觸控操作，但用手指左拉右拉感覺都好似滑鼠咁順暢。難得是版面設計似足舊版Windows，真係能尋回兒時回憶。
除了「接龍」外，當然不能不提「踩地雷」。它的畫面雖然較為簡單，但玩法更考智慧。《Minesweeper Classic 2》將經典的單機遊戲完全移植至iPhone，連屏幕頂部的笑面符號都有，過癮！加上右鍵放旗仔等指令，透過長Hold畫面便可以做到，玩得Classic。
撰文：林子聰