Must Try 獨家 A5 爆油黑樺牛

3年開20間分店

「孫三郎」來自九州熊本，這飲食集團向來主攻居酒屋市場，但據董事吉住武徒講，多年前已想開燒肉店，只是一直為靚牛尋尋覓覓。在嘗過神戶牛、松阪牛以後，最終還是鍾情「同鄉」靚牛黑樺牛，屬當地養牛牧場「杉本本店」出品。品牌的燒肉店於2004年正式開業，轉眼在熊本開了5間店，大受食客歡迎。適逢近月日本經濟麻麻，店子遂轉戰開拓香港、上海、新加坡等海外市場，更計劃3年內開20間海外分店，誇張！

熟成45天

論名氣，其獨家黑樺牛稍遜，但低調不代表冇質素。先是每隻牛都有編碼，方便追溯其成長過程，令人食得安心；其次是養牛人不計成本，堅持牛隻足25個月大或以上才屠宰，這樣牛肉脂肪分布最均勻，加上在當地熟成45天才來港， 真係成擔心機。整體來說，黑樺牛肉質嫩滑，牛味特別濃郁，富油脂卻不油膩，尤其適合做燒肉，脂肪經火一燒，即融！由於易熟，肉汁易保留，不怕柴皮！餐廳更實行「一頭買」，即原隻牛入貨，比傳統只入口特定部位，有效控制品質和成本，做到抵價益食家。

食勻各部位

供應香港店的黑樺牛，級數是最高的A4和A5級，以餐廳走年輕平價路線來講，都算以本傷人！原隻冰鮮牛抵店後，師傅會化身庖丁，將牛分割成多個部位，而雜碎下欄部分，則會用來煮醬汁、煮咖喱及熬湯，絲毫不浪費。牛肉部位選擇與本店相若，用來做燒肉的部位多達13個，西冷牛柳五花腹排牛肩脊肉等，幾乎跟當地的16個部位看齊，差在牛內臟不能入口，所以牛小腸牛肝牛胃全是本地貨。牛臀股肉肉味最重；西冷五花腩排最多雪花紋，油香在口腔爆破；牛肋腿的肉與油花分布最平均，最受日本人歡迎。

大盛芝士漢堡$88 以和牛炮製，肉質鬆軟，混和芝士和茄汁同焗，味道更香濃。	和牛肩脊肉$78 不同部位有不同切法，牛肩脊肉厚薄適中， 正好細嚼出油潤味道。	火炙和牛壽司$98（4件） 和牛油脂多，最啱燒一燒讓油香散發，飯粒吸收牛油精華，入口特別甘香。

矜罕牛排肉

不過，最矜貴的，我會推介和牛排肉。此部分又名三角腩，位處牛前腳對上的腩位、於第1及第6條肋骨切出的三角形位置，每隻500公斤的牛只有4至5公斤，僅做到兩份，激罕！入口柔滑，油香在舌頭上化開，牛香緊接而來，甘香餘韻更久久不散，可謂牛中極品。超乎想像的還有價錢，每份才$98，貫徹店子平價優質的理念。人少少又想試多多款，可柯打盛合拼盤，有二人盛、三人盛和極上盛合拼等，一客有齊幾個好吃部位，叫人大滿足。其中三人盛原價$780，11月更有半價大優惠（3人起，優惠限量），超抵食！除了燒肉外，店中尚有不少和牛熟食，像火炙壽司、漢堡扒等，都試得過。

極上牛小腸$58 油潤小腸燒得外皮香脆，內裏則煙煙韌韌，愈嚼腸味愈出。	和牛腰脊肉$78 腰脊部分較瘦，肉味濃郁有嚼勁。	自家製豆腐沙律$58 自製豆腐香滑兼重豆味，配以新鮮蔬菜，正好為濃重的燒肉作個間場。

Review

環境氣氛：★★★（以5★為滿分）

好味指數：★★★★★

必食推介：極上盛合拼、

和牛腰脊肉、極上和牛排肉

人均消費：$350

撰文：楊淑英　攝影：謝孝祥

查詢電話：2426 9000