雖然同樣係比利時國寶，但無論70後、80後或係90後，香港人認識藍精靈點都多過丁丁（Tintin）吧！這套漫畫在歐洲風行幾十年，仲吸引到兩位頂級大導史提芬史匹堡和彼得積遜合作，將丁丁拍成電影，今個星期便會在港上映。機迷更可玩埋官方遊戲，跟丁丁在《The Adventures of Tintin: The Game》歷險，探索獨角獸號的秘密，畫面比得上3D電影咁靚！
丁丁於1929年在報紙刊載後，一直紅爆歐洲，只係香港遲遲冇引入丁丁卡通，令好多人以為漫畫跟卡通只係日本出品！創作丁丁的漫畫家Georges Rémi於1983年離世之後，就再冇授權其他人創作落去，唔似其他漫畫角色翻出又翻出，但現時睇番丁丁所身處的「古代」同世界觀都相當有趣。香港早年曾將Tintin譯成「天天」，主要出於英文音譯問題，但實際上丁丁係講法文，在遊戲內聽番原汁原味的法文對白更抵死！
《The Adventures of Tintin: The Game》故事內容緊扣電影情節，講述丁丁因緣際會買到架「獨角獸號」帆船模型，從模型中搵到張藏寶圖而展開大冒險。雖然橋段有點老套，但在「那些年」熱潮下，其實簡簡單單都係一種韻味，尤其是用上半世紀的交通工具去冒險，更有趣味。角色設定方面，身為記者的丁丁雖瘦小，但好打不平、身手了得，懂得使用不同工具，遊戲開始時便要以寡敵眾，抵禦買唔到「獨角獸號」的衰老闆。遊戲內容還結合多元化玩法，如駕駛飛機通過狂風暴雨、在沙漠峽谷飛車等，都幾刺激。
其實遊戲主角並唔只得丁丁一個，還有他的小狗Milou，以及喜歡飲威士忌的船長Haddock，遊戲入面更可在特定關卡，控制佢哋進行冒險，正如先前所講，丁丁身手較靈活，可使用帶有鈎爪的手槍，將敵人拉到身邊攻擊；而Milou非常細小，可以捐窿捐罅去唔同地方；船長則以力量取勝，可以掟爆酒桶。嫌唔夠的話，還可於冒險過程中解鎖另外3位隱藏角色。遊戲備有單人及雙人模式，不過玩落的變化不大，反而最抵讚係遊戲畫面出色，PS3版除了支援PS Move體感操控外，還可配合3D電視，以立體享受當中挑戰，猶如置身3D電影般，戲迷必玩！
類 型：冒險
開 發：Ubisoft Montreal
平 台：Xbox 360、PS3
售 價：$359（Xbox 360）、$388（PS3）
查詢電話：2359 7998
撰文：布偉倫