的骰冧女Explorer好色！

男人愛鬥「大」，連手機都愛屏幕夠大、處理器夠快嘅型號。相反女人卻愛「小」，手機夠的骰才襯得起纖纖玉手。HTC新機Explorer今次就以「小」博大，不但尺寸小巧功能齊備，仲可以另購彩色背蓋，機身再唔係黑黑沉沉，女士必Buy！

5色外殼易襯衫

女生手掌大極有限，手機太巨型不但難以攜帶，使用時更容易甩手，都咪話唔危險！Explorer體積只有102.8×57.2×12.9mm，驟眼看正面僅大過一張八達通少少，加上僅重108g，又配有渾圓機角，莫講話小手拎得舒服，就算放落Clutch Bag仍游刃有餘。新機另一賣點是「好色」，除了原裝夠Cool的黑色背殼外，白、藍、橙、紫4色背殼亦會不日上市，儲齊全Set一星期就可以換足5天，方便OL日日襯唔同衣着。

高階屏幕冇狗牙

雖然Size縮水，但硬件絕冇偷工減料，例如屏幕採用了3.2吋480×320解像度TFT，屬HTC首度於入門機種搭載高階屏幕。小記即場上網測試，發現網頁文字清晰冇狗牙，播放YouTube HQ影片時亦相當細緻，抵讚！另外，鑑於定位入門，處理器既非Dual Core，時脈亦只有600MHz，然而轉頁、播片都唔覺慢，Benchmark得分更比速度相同的Wildfire S高，可見程式編寫更為成熟。有讚亦有彈，機身300萬像素鏡頭實在太低，加上沒有前置鏡頭及LED補光燈，配套認真一般。

提供5色背殼，惟白、藍、橙、紫色需另外購買，售價待定。

「捷徑和時鐘」Widget將時間、訊息等常用捷徑整合起來！

時鐘捷徑大整合

Explorer依然搭載Android 2.3.5薑餅系統，惟HTC Sense介面採用最新的3.5版，不但優化了外觀及操作體驗，還新增更多實用小工具，例如「捷徑和時鐘」把訊息、音樂、相機等常用捷徑整合為一，篤一篤就開到，新手都識用！社交功能方面，除可用Friend Stream睇晒朋友在不同社交網的狀況外，現在連相簿都可直接存取facebook內的相片，毋須逐張「單撈」！特別一提，手機還預載了新浪微博，用戶可時刻追蹤偶像動向！