Joshua X Caleb孖住飲孖住食

J：Joshua

C：Caleb　

Joshua

Caleb

膽粗粗入酒莊

J：記唔記得我哋幾時開始飲酒？

Baguette $68（下午茶餐，連茶/咖啡1杯）（b） 自製法包外脆內煙韌，夾着風乾24個月的巴馬火腿、芝士、番茄及火箭菜，好豐富。	2006 Anderson Conn Valley Vineyards Eloge $820（a） 著名酒評人Robert Parker評為95分！是孖仔公司的王牌。Caleb指它氣質優雅，擁有豐富的紅莓果香，隱隱帶點橡木桶的味道，能烘托出豬柳的天然甜香。	Kurobuta Pork $158（b） 美國Six Point靚豬的豬柳，肉質最嫩，以慢火燒至7成熟就最好，有種天然的豬肉甜香。

C：入咗大學就開始飲酒喇！我鍾意飲加州酒，因為每支都好有個性，而且果味好強烈。

2010 Conundrum A Proprietary Blend of California White Wine $280（a） 白酒充滿花香和果香，像桃、青蘋果及雲呢拿等，這款酒用多種葡萄釀製，層次複雜，與水果沙律、蔬菜三文治和拿破侖餅等都很匹配。	Strawberry Napoleon $40（b） 多層薄薄的酥皮，鬆脆無比，連同自家製忌廉和士多啤梨片，啖出清新。	Wine Journal$298（a） 這本由孖仔跟Moleskine合作出版的別注版Wine Journal，讓大家在品酒時做記錄，方便日後可重溫。

J：我知！就係因為鍾意飲酒，畢業時才會諗，到底去做Banker定係做生意。

C：嘩！我哋2009年在美國畢業，當時美國經濟好差，做「銀行」無出路，倒不如返香港做小生意。

J：不幸中之大幸，咁啱香港取消葡萄酒稅，所以好適合回流創業，好彩有班老友，一齊開公司賣加州酒。

C：仲記得我哋揸車喺加州出發，經過Santa Barbara、San Francisco等地，再去Napa Valley，搵酒莊傾生意，諗番起真係夠「薑」。

J：嗰陣經常畀人拒絕，大酒莊唔同我哋合作！哈！仲經常畀人懷疑唔夠21歲，成日要拎張身份證出嚟！

C：記得有一次直闖一個酒莊，見到莊園大門半開，膽粗粗走進去，竟然見到莊主！佢見我哋揸8小時車來搵佢，好感動之餘，仲將著名酒評家Robert Parker評為95分的酒畀我哋做代理，都算威水！

J：就係2006 Anderson Conn Valley Vineyards Eloge嘛！簡直成為我哋公司嘅王牌，最好賣最多人識。加州的酒莊可謂百花齊放，當地沒有規定酒莊種甚麼提子，不限釀酒方法，夠晒自由！

C：我鍾意加州酒夠Free Style，經常都飲出驚喜。當地9成酒莊都係家庭式經營，不一定為咗賺錢，好有Heart。

最緊要登對

J：諗番起「硬闖」酒莊，去不同酒莊叩門，千辛萬苦嘅經歷，真係好難忘。

C：係呀！不過我覺得幫朋友安排飯局都好好玩，好似一次幫鄧小宇搞飯局，同場張叔平同鍾楚紅都有來，好驚喜。

J：安排飯局最好玩的地方是Wine Pairing，因為酒有好大變化，同一支酒存放的溫度和時間不同，都會演變出不同味道，配搭好講臨場發揮。

C：配酒最緊要係個鼻，平日聞多啲、飲多啲，才可以累積經驗，腦海裏面就會累積好多關於食物和品酒的詞彙。當然，幻想力都好重要。

J：我覺得還要對食物感興趣，才能做出好的配對。我好鍾意將食物又舔又聞，了解它是甚麼。幸好從小到大，都無偏食！

C：做Wine Pairing，出發點好重要。究竟要突出食物還是酒？不是要配名貴的酒，而是要配啱的酒，酒與食物最緊要匹配，才能令兩者一齊昇華。

J：我同意！不是每支酒都是Food Wine。好像味道複雜的靚酒，最適合單獨飲，如果硬要配菜，就要配味道層次豐富的，先至「門當戶對」。

配酒沒有定律

C：好多人成日話「紅酒襯紅肉，白酒襯白肉」，其實都唔可以咁講，因為食材以外，還要視乎煮法和醬汁，唔可以一本通書讀到老。好似南乳燒雞，其實與薄身紅酒好夾。

J：配酒最緊要Open-minded，大膽嘗試，小心求證，要多睇多練習。記得上次食大閘蟹，我諗起蟹膏同飯的配搭，就想到用古酒（經過陳年的清酒）配蟹，出來效果都唔錯。

C：那次的確有驚喜！我欣賞你會Think Out of the Box，我本來想提議砵酒或些厘酒，最後都係試古酒。配酒就係咁，好似做實驗，要不停試不停試。

J：但係有些食物，就算不斷試配，都不像樣，好似烚蛋，全熟蛋黃會將單寧放大幾倍，好難飲。反而皮蛋同紅酒好襯，真係神奇！

C：湯同酒都係「怨侶」，紅蘿蔔豬（月展）湯、牛尾湯我都試過，完全唔襯！

J：食生蠔飲香檳，原來效果好得，兩者好似在口腔裏面Marriage！

C：哈！我哋嘅Wine Journal，就係想大家可以做個紀錄，每一次試酒，都寫低資料同感受，方便自己之後重溫。

J：係！依家資訊太氾濫，我比較喜歡坐低，打開本簿寫寫字，可以沉澱一下生活。

C：將來有機會睇番，可能會發現自己口味轉變咗，都幾有趣o架。

飯腳才是重點

J：其實飲酒只係一餐的前奏，飯桌係了解人的好地方。

C：但飲飲食食，的確是快樂催化劑，將人與人之間距離拉近。所以我好想研究Wine Pairing，希望大家有更多難忘的飯局。

J：我哋公司的口號係Wine Connect People嘛，我覺得就算面對不相熟的朋友，只要飲杯酒，心情就會放鬆晒，願意分享。

J：其實Wine Pairing最講究唔係支酒，或者菜式，而係同你分享的人。

C：Yes！

孖仔愛逛食材店

在上環的Fusion Gourmet，將高級食材店及餐廳合二為一，店內食材、產品全由老闆Friendly從世界各地搜羅，件件揀手。孖仔跟老闆夫婦稔熟，不時來這裏購物開餐。今次訪問，就由孖仔帶自己代理的酒，來配搭餐廳菜式。

Joshua Profile

細孖伍柏基，履歷與大孖一樣，專責處理跟莊園合作及銷售等工作。飲食口味較清淡，愛飲酒體輕薄、香味重的Pinot Noir。曾試為20款不同產地的杯麵配酒，覺得撈麵乾身，配酒最啱。

Caleb Profile

大孖伍柏華，畢業於UCLA（加州大學洛杉磯分校）商業經濟學系（Business Economics），為Angeleno Wine Merchant創辦人之一，負責管帳和營運工作。最愛飲Cabinet Sauvignon配濃味食物，未來最想為辣菜和零食配酒。

撰文：楊淑英

攝影：陳世昌

查詢電話：（a）6041 7657、（b）2545 0068