元朗秋遊影雀 長炮DC最啱鳥
秋天屬季候鳥南遷時節，近來上網都多咗人Post「打雀」靚相。若各位想貪得意學影雀，又怕器材和技術唔多夠的話，不如由淺入深，拎部長炮DC到元朗公園百鳥塔走一轉，塔內底層為開放式百鳥苑，有幾十個品種、百幾隻雀鳥任影，最正係遊人唔多，想點影靚相都冇難度！
長炮相機推介
Panasonic DMC-FZ150
扭芒拍高清
新機配上24倍變焦鏡頭，成像銳利，而且最遠可Zoom到600mm，在公園影雀已經夠用，最吸引是可拍埋全高清AVCHD影片！而機背3吋LCD備有扭芒設計，高抄低抄更方便。
售價：$4,690（a）
Samsung WB750
輕巧18倍Zoom
WB750鏡頭雖然只有24~432mm變焦，但機身比傳統Prosumer DC輕巧，方便攜帶。而新機既可用到光圈先決、快門先決等功能，還可用上趣味相框及HDR拍攝雀鳥。相機更設置鎖定及追蹤系統，影飛鳥都易啲。
售價：待定（b）
Canon SX40 HS
24~840mm長炮
24~840mm鏡頭加上數碼變焦能達140倍Zoom，屬市面其中一款變焦能力最強的Prosumer DC，影雀自然更有利。機背特設2.7吋扭芒，取景亦較容易，仲可調校內置閃燈輸出補光。
售價：$3,680（c）
（元朗公園）7層高塔
拍攝難度：初級 建議器材：長焦距Prosumer DC
百多隻雀鳥任影
元朗公園建在水牛嶺上，最高點更矗立樓高幾十米的百鳥塔，如果夠腳骨力經樓梯走上7層觀景台，便可以360度一覽元朗市中心、屏山甚至天水圍等地的風景。睇完靚景，走到底層的百鳥苑，便見到香港第一個開放式鳥舍，佔地85平方米雖然唔算大，但已棲息了百多隻不同雀鳥，大家可按圖索驥，從園內的雀鳥資料板比對品種，唔怕影完都唔知係乜嘢雀啦！影完雀，仲可以行埋元朗公園，內裏好有外國公園的草坡Feel，仲有一群群白鴿，消磨幾個小時都冇問題。
長焦距DC夠用
對於「打雀」初哥來說，地方唔大其實是一個優點，雀鳥唔會飛到冇雷公咁遠，追蹤都易好多。而且各位只需用一部10多倍Zoom的數碼相機已可應付，加上百鳥苑開放時間為白天，光源充足下，將感光度推至ISO 400已足夠，毋須另帶腳架夠晒方便。影雀技巧方面，基本是要保持安靜及慢行，開聲叫牠們「唔好郁」，佢哋可能仲飛得遠，所以構圖要預留空間，配合連環快拍功能，咁就唔怕雀鳥周圍飛。
百鳥塔資料
時間：8:00am~5:30pm（10月至3月）、
8:00am~6:00pm（4月至9月）
備註：平日12:00nn~1:00pm、逢星期三12:00nn~3:00pm暫停開放
地 址：新界元朗公園北路
入場費：免費
交 通：朗屏鐵路站步行約20分鐘，或從水邊圍輕鐵站步行約10分鐘
（香港公園）佔地3,000平方米
拍攝難度：中級 建議器材：長焦距Prosumer DC
講規模，香港公園的觀鳥園仲大過元朗百鳥塔，佔地達3,000平方米，係香港其中一個最大的觀鳥場地。觀景園內的雀鳥大多來自馬來群島，而且地處金鐘交通方便，很多時候都要同遊客爭位，「打雀」時需要更多耐性。
觀鳥園資料
時 間：9:00am~5:00pm
地 址：香港中區紅棉路19號
入場費：免費
交 通：金鐘港鐵站步行約10分鐘
（香港濕地公園）影黑臉琵鷺
拍攝難度：高級 建議器材：DSLR、長焦距鏡頭、三腳架
濕地公園所處的米埔，一向是季候鳥天堂，當中更有著名的黑臉琵鷺。不過濕地公園跟香港公園的半封閉式設計不同，雀鳥棲息位置較遠，用一般Prosumer DC實在難以拍攝，還要有足夠彩數跟耐性，才能影到靚相。
濕地公園資料
時 間：10:00am~5:00pm（逢星期二休息）
地 址：新界天水圍濕地公園路
入場費：$30（成人）、$15（小童、全日制學生、長者）
交 通：西鐵天水圍站轉乘輕鐵705或706線，於濕地公園站下車步行約9分鐘
3大要訣影靚雀
1拍攝時不要太貪心，宜鎖定單一目標，拍攝出清晰的雀鳥圖。
2如戶外受陽光直射的環境，因雀鳥羽毛多屬淺色，宜減低一級曝光值。
3切忌大聲喧嘩嚇親雀鳥或餵飼食物，「打雀」都要打得有品。
撰文：布偉倫 部分攝影：郭凱敏
模特兒：Jelly Au（M.Spy Model）
查詢電話（產品）：（a）2833 0955、
（b）3698 4698、
（c）3191 2333