Kinect Sports: Season 2 6項全能 掟鏢初體驗

6款新運動登場

上年《Kinect Sports》可凌空踢波兼跨欄，大人細路都鍾意玩。到今年《Kinect Sports: Season 2》當然要搞搞新意思，換上6款運動項目，如球類遊戲有高爾夫球、棒球、美式足球跟網球，另外還設有滑雪跟掟鏢。這些運動項目雖然係新設計，但大部分已曾經在其他體感運動遊戲中登場，惟獨是運動量唔太高的掟鏢就較少見，它可說是射箭的變奏版，毋須太大動作，亦唔使留意風向，最緊要係手定，準確擲入不同計分區域，最先扣晒501分的玩家便能獲勝。還支援4人輪流作賽，用來準備聖誕新年開Party至啱，亦比外出玩電子飛鏢平得多。

球類遊戲增賣點

雖然體感球類遊戲萬變不離其宗，但開發商於每款遊戲都加入新點子。玩高爾夫球時，除了可以體感揀桿及揮桿，亦可向前向後行調整擊球角度，而最特別係只要將一隻手放在眼上扮遠望，就可Zoom in睇晒球洞環境。至於棒球遊戲，玩家可擔當擊球手及投球手角色，擊中時要原地跑步扮走壘，如果玩得再認真啲，仲可伸長一隻腳扮剷壘，投入感爆燈；而投球手可擲出各種旋轉球，亦可踏前一步加快球速，有時更要扮接波。同樣運動量大而且刺激的滑雪比賽，玩家需要屈膝加速，還要向兩邊傾側身體穿過旗桿，遇上跳台仲要跳起，隨時玩到成身汗。此外，遊戲設有卡路里顯示計，可幫大家統計玩體感遊戲時所消耗的卡路里，打機兼Keep Fit冇難度！

滑雪要屈膝兼移動身體穿越旗桿，運動量大。

香港人唔多熟悉的美式足球，考你用戰術破敵。

類型：體感運動

打Golf有幾多特別動作，如前後移動調校角度。	擲飛鏢算是最Hea遊戲，但都考定力和腦筋。	有玩過《Wii Sports》，應不難掌握網球遊戲。

開發：Rare

除擊球及投球外，遊戲最特別是要跑壘及剷壘。

《Dance Central 2》細節做得更貼心。售價：$259

推出日期：已推出

平台：Xbox 360 Kinect

售價：$259

查詢電話：3071 4868

同場加映：《Dance Central 2》鬥舞

「動起來」的Kinect新作還有《Dance Central 2》跳舞遊戲。雖然玩法與上集差不多，但今次可支援2人同時跳舞，隨時加入或退出都得；玩2人Dance Battle時更設有Solo時段，當射燈照向玩家時可勁跳搶分。另收錄了44首歌曲，好似《Somebody to Love》、《Born This Way》等，嫌唔夠喉更可上Xbox LIVE買歌。

撰文：布偉倫　攝影：陳富權　模特兒：Cindy（M.Spy Model）