Big爆巫婆湯盡地一煲

Halloween要玩得盡興，不一定要鋪鋪出「鬼」咁嚇人！

像MegaBox便變身「巫婆廚房」，以可愛南瓜作布置主題，效果一樣好出位，大煲小煲「老火靚湯」擺在眼前，最大一煲更高達15呎。只見「靚湯」長煲長有，煲極唔完，原來湯料未夠入味，靚女巫婆仲話，煲靚湯一定會預埋大家，你仲唔快啲埋位？

15呎湯煲滾熱辣

黑心巫婆忽然下廚煲靚湯？唔使睇都知道有古怪喇！近日MegaBox擺了多個大湯煲，唔係煲薑醋，而係煲南瓜，鬼叫Halloween就到，身為妖魔一分子的巫婆，當然要出啲力招呼大家。場內最大一煲湯高15呎闊13呎，造型如南瓜似的，滿布搞鬼Props，仲會不時轉色，妖氣沖天，大家可以化身「人肉湯料」，跳入湯鍋，一嘗被「煲」滋味。

巨型湯煲有不少鬼怪Props，想拍番一輯嚇鬼艷照，真係話咁易！

煲內顏色會不斷變化，一時由橙轉黃，一時由黃轉綠，十分詭異。

小豆丁扮鬼有Cert.攞

到了今個星期日（5:30pm~7:30pm），靚女巫婆更會親身到場睇火，小朋友只要夠膽行埋她身邊，就有機會攞到糖果，體驗Trick or Treat樂趣。自問扮嘢天分高的小朋友，不妨於當日扮鬼扮馬，化身巫婆、南瓜鬼、殭屍等造型，角逐「最驚嚇」及「最具創意」等造型大獎。此外，商場L9童真天地將舉行「鬼馬筆筒工作坊」，小朋友可免費參與，齊齊把鬼主意變作搞鬼作品帶回家！