踩滑板衝斜坡挑戰X-Game

滑板專用場地

很多人將滑板和「反叛」畫上等號，其實滑板屬X-Game比賽項目之一，講求個人技術、創新和速度，在不同障礙物中駕馭滑板，做出花式動作。香港近年開始建設滑板專用場地，好似康文署轄下便有超過7個地方，提供滑板設施如高台、斜台、矮欄等。今次兩位「板女」約埋2010年亞洲極限運動錦標賽的滑板冠軍陸俊彥（俊仔）到滑板場，睇吓從高手身上學唔學到一招半式啦！

裝備簡單易入手

講開滑板招式，要跳來跳去又要騰空動作，會唔會好難學呢？俊仔現時有開班授徒，他表示：「其實玩滑板毋須太多裝備，無論你是入門初哥或專業運動員，使用的滑板都不會有太大分別，最重要係學識點樣『跌』，之後只要熟習平衡和衝刺，已可嘗試基本跳躍（Ollie）等花式動作。」有時新手和資深玩家做同一套動作，只是在平地玩和高台玩之不同，難度已有很大分別，對於重心平衡的技巧和要求更高。

同樣係上杆花式，但搬到高台進行，難度大大提升。

Five-O是高速滑向斜台並以板尾在邊緣滑行。

並非男仔專利

別以為滑板係男仔玩意，兩位「板女」經俊仔指導下，好快就學識平衡和簡單滑行。他補充：「其實香港有唔少女仔玩滑板，7~10幾歲的女仔我都教過。這個荔枝角滑板場不時會遇到『板女』，她們甚至在facebook開設女玩家群組呢！」玩咗一陣真係見到有「板女」入場，仲上埋高台練習，技巧比不少男仔優勝呢！

以滑輪之間的空位在物體邊緣滑行，需結合衝刺和Ollie跳躍動作。	掌握平地衝刺後可上小型斜台，更有速度感。	想喺杆上滑行，要先練好Ollie跳躍動作。

入門基本功

滑板入門基本當然要識得「滑」，上板後雙腳不要合得太埋，身體重心要微微傾前，滑行時就容易平衡。之後還要識「停」，俊仔教路，如果平衡唔到記得先跳下來，切忌踩停塊板；此外，「轉彎」時可一隻腳踏前，另一隻腳踏住板尾翹起的位置，後腳用力微微踩起塊板，前腳引導板身移位，咁就可以轉向。

雙腳太埋容易失平衡，初玩驚的話搵人扶住先！	單腳用力踩板尾使板身豎直，咁就可以拎起滑板！	荔枝角 Skate Park 香港最早落成的滑板場，可玩滑板、Inline Skate和BMX三類X-Game。

板友集中地

唔想周街滑，大可去正規的滑板場練習，仲可結識志同道合的板友，互相分享心得。

東涌 Skate Park 設施落成時康文署曾找來一班專業滑板玩家「試場」及修改設施。

粉嶺 Skate Park 最新落成的新界滑板場，北區玩家唔使山長水遠搵場踩板了。

專人教授 滑板訓練

不少人會上網睇片自學滑板，但想玩花式的話，當然搵專人教授更易上手。香港極限運動聯會備有訓練班，有興趣的話大可到網上瀏覽。

團體訓練初班

類　　別： 滑板、特技直排滑輪、

　　　　　 自由式BMX小輪車

每堂時間：1小時（共3堂）

每班人數：4至8人

地　　點：荔枝角公園滑板場

費　　用：$400

備　　註：另備私人訓練班，每小時$300/人、

　　　　　 $500/2人，4小時起。

網　　址：http://x-fed.com/

X-Game裝備推介

除了滑板外，X-Game還有特技直排滑輪Inline Skate和自由式BMX小輪車。新手唔知買甚麼裝備？小記問過資深玩家和店舖，入門玩家不妨睇睇以下推介。

Habitat的板身軟硬度適中，玩花式更就「腳」。

淨板身：約$480

整套滑板：約$1,050

Girl以女性圖案為主，在眾多滑板牌子中算出名。

淨板身：約$480

整套滑板：約$1,050

Alien Workshop以外星人為Logo，造型前衞。

淨板身：約$480

整套滑板：約$1,050

同場加映

Inline Skate Razors Genesys約$1,580

查詢電話：9047 2110

BMX小輪車

Eastern Bike 2011

約$2,900

查詢電話：3579 2920

撰文：李潤康　

攝影：郭凱敏

模特兒：Vivian Law、Bonnie Kwan（M.Spy Model）