熱身應節 猛鬼出App

哈囉喂就快到,大家有冇約定班Friend去玩呢?未約實都唔緊要,只要各人手執iPhone,便可玩盡各款免費的應節Apps,有的利用影相「嚇鬼你」、有的變聲「扮鬼扮馬」、有的自製「搞鬼」靚相,款式千奇百怪,仲有齊南瓜頭、七彩糖果同科學怪人等出現,未到正日,氣氛經已High爆!

No.1:《Coin Dozer - Halloween》應節推銀仔

推銀仔相信很多朋友都玩過,《Coin Dozer》早前推出過曲奇、復活節等特別版,估不到他們連萬聖節都唔放過。新版設計甚有心思,背景是古老紅頂磚屋,有時候更會變成陰森的半夜,真係夠晒氣氛。加上備有不同的小鬼、南瓜頭和巫師帽等可愛道具供各位收集,愛玩推銀仔的朋友萬勿錯過!

售價免費

No.2:《iGhost.》全城捉猛鬼

唔知大家細個時有冇睇《捉鬼敢死隊》呢?見主角拎住探測器四周搵鬼好不過癮。現在終於有機會玩了,皆因《iGhost.》一經衞星定位,介面就會顯示附近有鬼出沒的位置,而且猛鬼種類甚多,仲有埋中文解說。最過癮是捉鬼時音效陰森恐怖,增加不少驚嚇氣氛,成功捉鬼後更可和鬼魂拍照,真是人鬼一家親!

售價免費

No.3:《Halloween Voice Transformer》怪聲傳朋友

每逢節日總會收到大堆電子賀卡和短訊道賀,有否想過萬聖節時,給好友一個驚喜呢?各位只需利用《Halloween Voice Transformer》,便可將聲音轉化成科學怪人、骷髏骨及鬼魂等聲調,然後儲存下來,到時再轉寄給朋友,嚇佢一跳之餘肯定樂趣滿Fun。

售價免費

No.4:《Holiday Picture it!》節日貼紙相

相約一班好友四處遊玩,拍照留念梗係唔少得!為相片加相框、特效等Apps多不勝數,但最好當然是配合埋節日效果,紀念性立即倍增!《Holiday Picture it!》備有快到的萬聖節、聖誕節和新年等日子,每款都有5至6種免費圖案供選擇,想要多幾款就需以0.99美元訂購。

售價免費

No.5:《Prize Claw Halloween》鬼怪夾公仔

夾公仔大家現實都玩過,可能仲交咗唔少學費!依家《Prize Claw Halloween》唔使畀錢都可讓各位過吓癮,機內放滿萬聖節公仔,有南瓜、骷髏和小鬼等,每個也有不同分數,儲夠分便可升級。不過夾公仔每日都有限定次數,要儲齊所有款式才算爆機,幾考大家的耐性和技術!

售價免費

撰文:李家俊