古船鬧鬼維港開Party

江湖傳聞，維多利亞港有「鬼船」出沒，初時還以為是殭屍海盜、鬼怪船長由加勒比海來到香港，殊不知是一班本地嘩鬼搞搞震！

夜幕低垂，面向黑鼆鼆的海港，加上有一眾嘩鬼「助興」，氣氛詭異，如此Halloween Party，有興趣試試嗎？

想一睹「鬼船」真面目？毋須等時運低，只要聽到海上傳來詭異音樂，轉個頭就會有艘橙紅色中式大船漂埋岸邊，更會見到「一眉道人」搖着銅鈴向大家招手……究竟這艘船搞乜鬼咁恐怖？小小特派員悅悅與Cyrus決定以身犯險，將船上鮮為人知的好玩秘密公諸同好……

70後觀光船古色古香

「鬼船」橫行維港，原來又是Halloween惹的禍！眼見全城搞鬼，永安旅遊也來湊熱鬧，大搞「海上漂浮萬聖夜」活動，將一艘Made in Hong Kong的中式遊船變作嘩鬼行宮，接載大小朋友出海，一起化鬼妝、扮鬼臉、聽鬼古、畀鬼嚇……於維港背景下，為Halloween喝采。

骷髏頭麻雀枱是場內最有氣氛的影相位，難得悅悅跟Cyrus一啲都唔驚，仲玩到笑晒口呢！

骷髏頭麻雀枱是場內最有氣氛的影相位，難得悅悅跟Cyrus一啲都唔驚，仲玩到笑晒口呢！

撞鬼船河包一人四杯飲品，畀「厲鬼」嚇到嗌破喉嚨，也可以用來潤潤喉。

船上的嘩鬼「恐怖」得來又有少少Nice，記得捉住佢哋合照喇！

其實「鬼船」本身已值得一遊，原名「鳳凰號」，早於1978年建成，造船者為當年本港首屈一指的協興祥船廠，並由前港督麥理浩夫人主持下水禮，去年尾才易名為「攜程號」。它是一艘以柚木建造的特色古船，船身展現中國傳統工藝，又不乏昔日殖民地色彩，一般市民很少機會登船，主要用於接載遊客，曾載過包玉剛、土耳其國家足球代表隊等名人，今次化身「鬼船」現身，堪稱歷史性一頁。

現場有化妝師候命，大小朋友不妨化個鬼樣，角逐「萬聖節主題化妝大賽」。

嚇人「鬼」才
勾魂使者

紅衣女鬼&白臉殭屍

個半鐘行程驚喜連場

「鬼船」會接載大家去邊？放心！目的地不是閻王殿也不是水晶宮，只是於維港巡遊一番，航程約個半小時。接待遊人的鬼怪有十多隻，由碼頭登船開始，「一眉道人」已手持銅鈴迎接大家，之後「白臉殭屍」、「紅衣女鬼」、「勾魂使者」等鬼怪會逐隻現身，有時玩出奇不意，有時玩前後夾攻，驚嚇度不比主題公園的「搞鬼節目」遜色！