SR超合金Dai-Guard 打樁機再現

故事中的機械人Dai-Guard由一班企業職員駕駛，機體既沒有華麗武器，亦欠缺花巧招數，但紮實的劇情卻贏盡口碑。如今SR超合金Dai-Guard登場，用料十足，四百幾元唔使負債都買到啦！

撰文：廖俊斌

左手的鑽口有開叉部分，用來破壞外星人。

拉出式關節令肩膊可大幅移動。

攝影：陳世昌　查詢電話：2433 1828

附送界震地雷，用來設置陷阱引爆敵人。	右手的網槍可透過換件重現發射姿態。	多得下身及骨架由合金製成，擺單腳飛腿等姿勢都掂。

肉搏系好扭力

Dai-Guard主要以拳打腳踢等肉搏招式對付外星敵人，武器只不過是對怪物「開齋」跟「埋齋」時的架生。擁有柱狀手腳造型的它，倒有幾分似過氣萬能俠，但亦因而具備絕佳的可動性。最驚喜莫過於膊頭部位，備有拉出式關節，可扯出來舉手或出拳。至於下半身部分，雙腳連同身體骨架均使用金屬製造，足料實淨；腳掌跟腳踝更採用分件設計，加入Ball Joint提升接地性，單腳擺甫士都企得穩！

拆除拳頭再換上摩打插蘇，就能擺打樁機甫士。	金色頭冠硬身尖銳，大家可換成軟膠版。	打樁機前端機械鉗可拆開，方便換上樁釘。

裝備功效有來歷

除咗有斤両十足的合金身軀外，新作連配件都零舍豐富過人。雖則好多所謂「強勁」的武器，在故事中都有使用問題，例如左手裝上電鑽，因機體承受不了強大的旋轉力，隨時未鑽穿敵人前已廢了手臂；另外機體本身唔識飛，因此右手換成網槍，便成了捕捉空中敵人的唯一武器；連機械人例必擁有的「鐵甲飛拳」，Dai-Guard亦有這一招，只不過故事中的它是扯甩左手來投擲「發射」，讓玩家再現頂癮場面。

後期型換裝重現

Dai-Guard的終極絕招「人肉打樁機」可說跟《勇者王》有異曲同工之妙，亦是故事後段的重要武器。這款「工程」味甚濃的配件，其實是靠強力摩打的左手，插入右手打樁機部分，注入動力來將樁釘貫穿敵人。機體只需換走左右手即可出招，而且拆走打樁機前端的機械鉗，更能換上樁釘，配合初回特典的「爆烈」特效，終極絕招表現得入型入格！