PDXtra TV網絡盒腦力爆發

Smart TV今年彈起，透過電視便可上網兼睇片，只是利用遙控器打字一來不便，二來唔係個個都願花萬多元換電視。為此3BAYS推出PDXtra TV網絡盒，除了自家設計出簡易操控介面，更附送一套專用鍵盤和滑鼠，接駁電視後便可變身成Android TV，娛樂功能拍得住電腦，以後想上facebook、玩Apps，毋須再開電腦咁煩啦！

售價：$1,680

專用鍵盤方便

叫得做專用鍵盤，當然唔係隨便加個Logo就算，鍵盤特別於右方騰出空間擺放滑鼠，另加入6個快捷鍵，對應系統的多媒體功能如睇片、播歌等，而且還備有「X」鍵，隨時關閉運作中的程式，開多幾個Apps都唔怕拖慢部機；滑鼠方面，左右鍵同時按就可快速進入目錄。另於屏幕下方加入RSS新聞播放，而且於不同使用介面會有相應類別的RSS，方便過你用電腦周圍搵News。

自動無邊顯示

PDXtra TV雖然預載Android 2.3系統，但為了體貼本地用家，特別引入20種專利技術，對介面進行優化。小記試玩時，對其中一種「無邊」串流技術頗有驚喜，這技術除了可令網上短片和網絡電視更穩定外，仲識得自動調節畫面，只要簡單地用滑鼠將游標停留在畫面左上角並長按左鍵，系統便能調校最合適的全屏顯示，不會因畫面比例而出現黑邊，這樣就算播放不合電視尺寸的影片或相片，新機都能校番啱！

備有4個USB 2.0插槽，還支援microSD卡。

鍵盤有專用快捷鍵，右邊預留空間供滑鼠使用。

精選至Fit應用

玩開Android手機或平板的用家都知道，大多Apps需要篤芒或體感操控，但係去到網絡盒冇這些功能點玩呢？廠方為此預備了WOW Market軟件平台，精選能完全應用於電視的Apps供下載。數量上係有啲輸蝕，但勝在經專人測試，支援方面有保證。而且有齊晒facebook、MSN等社交平台，以及內地受歡迎的視頻及短片分享網站，可以喺客廳慢慢欣賞。