近期多間航空公司都做特價優惠，趁平去旅行着實吸引，小記有不少朋友便專程到歐美自由行。不過自己去旅行的話，交通、食宿甚至行程等問題都要貴客自理，經驗唔夠嘅自由行人士可能會擔心，但只要下載幾個實用旅遊「貼士」Apps，所有問題便能迎刃而解！
旅行唔識路，最正常係伸手截的士，但世界唔係個個地方都好似香港搭的士咁平，日本搭的士屬天價，美國搭的士畀少啲貼士會畀司機鬧。《World Taxi - Fares and Tips》最正嘅地方係列出超過60個城市的士指南，包括東京、新加坡、洛杉磯、倫敦等，由起錶到跳錶，由現鈔至轆卡，由的士安全到Call車服務都有，以後唔怕被司機漫天開價！
售價 免費
出發旅行前，很多人都會買本旅遊書傍身，不過書內的推介始終頗大路，想知道地道且由旅客提供的第一身「Best Kept Secret」推介，就可下載這個免費App。某程度上《Tips and Trip》類似社交網絡，大家可以上載景點介紹，其他朋友又可留言，睇吓推薦的地方係咪咁正，最啱小記這種即興而又冇事先計劃行程的人。
售價 免費
外遊另一樣困擾的事情，應該係要畀幾多貼士才合理，例如到美國餐廳食飯，畀少過10%貼士即表示食物及服務質素未達標，隨時引起不必要的誤會。《Tipping Tips》搜羅全球108個國家及地區的服務費「習慣」，例如酒店清潔房間貼士係幾多，畀幾多貼士Bell Boy拎行李等。程式更設有計算機，只要輸入身處地區，便會幫你計埋加上貼士後的總額。
售價：0.99美元（折約港幣$7.7）
雖然歐洲廉價機票近期勁平，除非要由英國飛西班牙等較遠航點外，搭火車遊歐洲實在方便又省時。但各位要知道，歐洲火車班次之多、路線之複雜，單睇班次表隨時一頭霧水。為iPhone裝《EuroTrains》就簡單得多，上網輸入起點和終點，便能搜查出最方便路線，仲會顯示轉車站及所需時間，最吸引是有埋身處火車站地圖，亦支援到AR實景資訊。
售價：1.99美元（折約港幣$15.5）
去美國玩，都預咗搭內陸機時有誤點甚至取消航班情況，小記就試過幾次。但美國普遍機場的面積頗大，滯留期間要搵詢問處或醫肚地方都唔易，《Airport Guide - iFly》便內置美國大小機場資訊，可下載埋航運大樓的地圖，要搵出辦公室或餐廳商店等十分方便。另外更提供各航線的查詢電話和地面交通等，而接上Wi-Fi後更可知道最新航班升降資訊，唔使望天打卦。
售價 免費
撰文：布偉倫