平日行街兜了路，頗常見，人人都有盲炳的時候；乘搭巴士蕩失路，就好不尋常，職業司機怎能是盲毛？
早前有新紮女車長首日開工上路，駕着大巴竟然行錯路，明明要上快速公路，卻走進了鄉村單程路，要靠乘客指點帶路及落車開路，才走出歪路回到正路……
幸好大巴乘客夠機警，換轉是我，一定手足無措。我是那種只關注目的地及車費的無知百姓，從哪裏出支線？由哪裏出公路？在哪裏可以抽頭？於哪裏不能轉左/右？我~點~知~啫！若果我懂得所有駕駛知識，我就揸私家車啦，還用與一干人等逼巴士？我重申：我只是一名無知百姓，支持路上零意外，盡力做好行人與乘客的角色，但無意做埋司機的一份。
可惜，近年乘搭的士，我不下一次被要求一人分飾乘客與導航角色。某次由紅磡去尖沙咀新港中心，帶鄉音的女司機答：「唔知邊度新港中心喎！」我說：「咁你知唔知鼎泰豐響邊嗎？」她答：「唔知乜嘢係鼎泰豐喎！」我忍着，說：「咁你知唔知海港城響邊嗎？」她好叻地答：「咁我梗係知啦！你咁講咪得囉！」我再沉住氣，說：「海港城是在新港中心對面，但我要去嘅係新港中心，萬一你去到天星碼頭先畀我落車，我咪行餐死？」
我無意歧視新移民，但有些工種，只適合識路的本地薑和地頭蟲。
旅遊飲食寫作人