連動Kinect！Radar打機過癮

身邊的朋友買親智能手機，唔係揀iPhone就係Android手機，好像忘記了Windows Phone（簡稱WP）！講好玩，WP其實都唔輸蝕，好似HTC Radar搭載了最新WP 7.5系統，不但打機時可跟Xbox LIVE同步，仲可與Kinect連動，玩後感只有兩個字︰過癮！

售價︰$3,498

杧果接駁Kinect

上代WP 7已經可與Xbox LIVE同步，這款代號為杧果（Mango）的WP 7.5仲可以點強化？原來新系統提升了連線功能，例如登入帳戶後，便可看到好友的即時狀態、打機戰績及玩過的遊戲；另外「特賣場」亦全面開通，不但有更多Games選擇，現在連Avatar的服飾都可以購買，選擇比以前更多。新版亦加入Kinect連線對打功能，預載的《漂流危機》便是首款遊戲，手機用家負責興波作浪，另一位連住Xbox Kinect的玩家則用身體保持平衡，最適合情侶玩。

追加中文輸入法

HTC曾經為WP系統出過HD7及Mozart兩部手機，但講受歡迎程度卻輸足Desire幾條街，最大原因是沒有中文介面。痛定思痛，WP 7.5的500多項更新中，終於追加中文介面及繁簡體輸入法，從此打SMS方便得多。此外，上代冇Multi-tasking畀人鬧爆，今次亦從善如流加入。其他更新還包括在People Hub引入「群組」管理聯絡人，Outlook Mobile能統一收發電郵，最方便是SkyDrive免費雲端服務，可讓用戶隔空存取Office文件，甚至可把相片傳送到快圖美曬相，方便到暈！

僅厚10.9mm，薄過好多智能手機。

一體成形機背設計，要開殼才換到SIM卡。

沿用WP 7的磚頭介面，但全面中文化，用落更親切。

廣角大光圈鏡頭

Radar的機身設計亦進步不少，例如配色改為白撞銀，加上仿陶瓷機背及一體化設計，比傳統黑沉沉的智能手機討好得多。鏡頭亦再「升呢」，雖然500萬像素唔算勁，但卻改用BSI背照式感光元件，擁有高感光、低雜訊等優點，配合28mm廣角、f/2.2大光圈及全景模式，影夜景靚到爆！新機的多媒體功能亦見豐富，既支援5.1環繞音效及DLNA影音分享，日後還可透過HTC Watch租碟，出街都可以隨時用手機睇電影。