下白泥秋耕即摘瓜菜卜卜脆
都市人成日被石屎森林包圍，想吸一口新鮮空氣都唔容易，不如趁住初秋，天氣冇咁熱，拋低煩瑣工作體驗做農夫的樂趣！9月份正值茄子、芋頭、油麥菜當造收割期，今次一於同o靚模Debby到下白泥近20萬呎的綠油油田園，摘鮮甜肥美的瓜菜，齊齊體驗即摘即食快感。除了收割外，還可以親身嘗試翻土、播種、灌溉等農務，做一日農夫接觸大自然。
收割時令瓜菜
平日在街市買到的瓜菜，大多由內地運來，經過運輸、包裝、存放，新鮮程度已大幅下降，如想體驗新鮮瓜菜的清甜爽脆，位於下白泥的綠油油田園是不錯選擇。園主陳先生熱愛大自然，親自開拓近20萬呎農地，冬季時種滿士多啤梨，全園布滿紅綠兩色，鮮艷搶眼。
初秋時則以當造瓜菜為主，內有初熟的油麥菜、茄子、芋頭等，遊人能親手收割之餘，還可借用爐具，即時煮熟瓜菜品嘗。油麥菜只需用熱水淥幾分鐘，然後淋上熟油及豉油便可，口感清新爽脆，能充分感受其新鮮感。除了當造瓜菜即摘即食，園地還設有燒烤爐，遊人可乘秋涼燒嘢食呢。
品嘗當造生果及香草
一般新界農田為了方便管理，都只會種兩、三款農作物，但綠油油田園為了令遊人感受不同的農耕樂趣，培植了十多種瓜菜水果，近期當造的生果就有大樹菠蘿及龍眼，煮食用香草有鼠尾草、迷迭香、紫蘇葉，瓜類有茄子、車厘茄等，全部都可以親身收割。
鼠尾草能去除肉類羶味，烤羊肉時落少許就最適合；茄子有長身的中國品種及圓身的日本品種，前者鮮甜，後者肉厚，清蒸或炒魚香茄子都一流；遊人更可以帶埋大閘蟹去，即場摘一兩片紫蘇葉來清蒸，肯定倍覺滋味。
即摘即煮三部曲
Step 1 青翠的油麥菜生長至成個人咁高，用剪刀輕輕地在菜幹一剪便可。
Step 2 清洗後放在熱水中淥幾分鐘，等顏色開始轉深，再淋上熟油及豉油。
Step 3 Debby品嘗後話口感清新，咬落爽脆，比街市買到的新鮮得多。
體驗農耕樂
當造瓜菜即摘即食固然吸引，如想進一步體驗農耕樂趣，各位亦可即場變身農夫，由翻土、播種、灌溉一手包辦。嫌一日農耕未夠喉的話，更可租用農地，1×3米農地收費每月$100，經濟抵玩，平日仲會有工作人員幫手照顧，到了成熟時期便可回來收割，品嘗自己種植的農作物。
翻土
先將泥土翻鬆，然後整平，記得要預留兩旁方便灌溉。
播種
播種要平均，不能集中在一個地方。
收割
成熟時會邀請各位一起收割農作物。
農耕收費
一日體驗農耕：$60/位（送１磅瓜菜）
租田體驗農耕：$100/月（1×3米農田）
日落靚景 攝影迷必去
山長水遠來到下白泥，除了體驗收割及農耕外，更不能錯過黃昏日落靚景，盡情欣賞鹹蛋黃般的夕陽慢慢落下，拎起相機拍攝這動人一幕。
綠油油田園資料
地 址：流浮山下白泥稔灣路
開放時間：9:00am~6:00pm
入 場 費：$30/位（最少20人）
收 割 費：任何瓜菜$20/磅
即摘即食團：$120/位（最少20人，連入場費、農耕體驗、2磅瓜菜及爐具烹煮）
燒 烤 團：$90/位（最少10人，連燒烤包及爐具）、$100/爐（自備食物）
撰文：周仲明 攝影：方偉堅
模特兒：Debby（Pure Models）
查詢電話：9219 4066